ចំនួននៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ ក្នុងខេត្តកំពង់ធំ មានការកើនឡើង

នៅព្រឹកថ្ងៃទី៨ ខែធ្នូ ឆ្នាំ២០២២ លោក ជា ពុំ ប្រធានលេខធិការដ្ឋានរៀបចំការបោះឆ្នោតខេត្តកំពង់ធំ លើកឡើងថា ចំនួនប្រជាពលរដ្ឋដែលមកពិនិត្យឈ្មោះ និងចុះឈ្មោះបោះឆ្នោតនៅក្នុងខេត្ត មានការឡើង ដែលនេះបញ្ជាក់ថា ប្រជាពលរដ្ឋមានការយល់ដឹងអំពីតួនាទីជាពលរដ្ឋល្អ និងបានអនុវត្តន៍កាតព្វកិច្ចក្នុងការត្រៀមខ្លួនជ្រើសរើសតំណាងដឹងនាំប្រទេស ស្របតាមចន្ទៈរបស់ពួកគាត់ ដែលនឹងស្តែងចេញតាមរយៈការបោះឆ្នោតជ្រើសរើសតំណាងរាស្រ្តនៅឆ្នាំ២០២៣ ខាងមុខ។

លោកបញ្ជាក់ថា ការិយាល័យចុះឈ្មោះបោះឆ្នោតមានទីតាំងនៅតាមសាលាឃុំ សង្កាត់ និងតាមភូមិ នៅក្នុងខេត្តកំពង់ធំ សរុបចំនួន១.១៥២ការិយាល័យ ដែលបានចាប់ផ្តើមដំណើរការពិនិត្យ និងចុះឈ្មោះឆ្នោត ចាប់ពីថ្ងៃទី២០ ខែតុលា ឆ្នាំ២០២២ រហូតមកដល់ត្រឹមព្រឹកថ្ងៃទី៨ ខែធ្នូ ឆ្នាំ២០២២ មានប្រជាពលរដ្ឋមកចុះឈ្មោះថ្មីចំនួន ២៨.៩៥៧នាក់ ស្មើរនឹង១៥៥.៣៣% ធៀបចំនួនប្រជាពលរដ្ឋប៉ាន់ស្មានដែលអាចចុះឈ្មោះបាន ក្នុងនោះប្រជាពលរដ្ឋអាយុ១៨ ឆ្នាំឡើង មានចំនួន៩០.០៥% , ប្រជាពលរដ្ឋផ្ទេរឈ្មោះមកពីក្រៅចំនួន៦.០១៩នាក់, ប្តូរការិយាល័យក្នុងឃុំ សង្កាត់ ចំនួន៣.១៧២នាក់ និងលុបឈ្មោះចេញពីបញ្ជីបោះឆ្នោត ដោយសារផ្លាស់ចេញ មរណៈភាព ដកសិទ្ធិ សរុបចំនួន ១៣.១៤៨នាក់៕

អត្ថបទ៖ ឈាង មករា