សម្ដេច​តេ​ជោ នឹង ជួប​សំណេះសំណាល ជាមួយ​ពលរដ្ឋ​ខ្មែរ​នៅ​អឺរ៉ុប​ម៉ោង​១០​យប់​នេះ (​ម៉ោង​កម្ពុជា​)

សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃព្រះ​រាជាណាចក្រ​កម្ពុជា នឹង​ឆ្លៀត​ជួប​សំណេះសំណាល​ជាមួយ​ប្រជាពលរដ្ឋ​ខ្មែរ និស្សិត ដែល​កំពុង​រស់នៅ និង​សិក្សា​រៀនសូត្រ​តាម​បណ្តា​ប្រទេស​នានា​ក្នុង​តំបន់​អឺរ៉ុបនៅទីក្រុងព្រុចសែលម៉ោង១០និង៣០នាទីព្រឹក ត្រូវនឹងម៉ោង១០យប់នេះ (ម៉ោងនៅកម្ពុជា) ដើម្បី​សម្តែង​ការ​នឹករលឹក ក៏ដូចជា​បង្ហាញ​ការ​វិវឌ្ឍន៍​នានា​ពាក់ព័ន្ធ​សង្គមជាតិ​។

​សម្តេច​តេ​ជោ ហ៊ុន សែន រាល់ពេល​ដំណើរ​អញ្ជើញ​ចេញទៅ​ក្រៅប្រទេស ជាពិសេស​នៅ​អឺរ៉ុប និង​អាមេរិក ទោះបី​មមាញឹក​នឹង​ការងារ​យ៉ាង​ណា​ក្តី ក៏​សម្តេច​តែងតែ​ឆ្លៀតឱកាស​ជួប​សំណេះសំណាល​ជាមួយ​ប្រជាពលរដ្ឋ​។ ជំនួប​នេះ​បាន​បង្ហាញ និង​ស្តែង​ឱ្យឃើញ​ពី​ការ​នឹករលឹក របស់​សម្តេច​តេ​ជោ​នាយករដ្ឋមន្ត្រី ចំពោះ​ប្រជាពលរដ្ឋ​ឃ្លាតឆ្ងាយ​ស្រុក ដែល​ខ្លះ​ឃ្លាត​តាំងពី​សម័យ​សង្គ្រាម និង​ខ្លះទៀត​ឃ្លាត​ព្រោះ​បុព្វហេតុ​ជីវិត​។

ជំនួប​សំណេះសំណាល​រវាង​សម្តេច​តេ​ជោ និង​ប្រជាពលរដ្ឋ​នៅក្រៅ​ស្រុក ក៏​ជាការ​ផ្សារភ្ជាប់​ទំនាក់ទំនង​រវាង​រាជរដ្ឋាភិបាល និង​ប្រជាពលរដ្ឋ​នៅក្រៅ​ស្រុក ដើម្បីឱ្យ​ពួកគេ​បាន​ជ្រូត​ជ្រាប​ពី​បញ្ហា​ស្រុកទេស​របស់ខ្លួន​។ ជាពិសេស​តាមរយៈ​ជំនួប​នេះ ក៏​ជា​ការ​ទាញ​ភ្ជាប់​ប្រជាពលរដ្ឋ​ដែល​រស់នៅ​ឆ្ងាយ​ស្រុក បាន​ផ្សារភ្ជាប់​ជាមួយ​ប្រទេស​កំណើត​ខ្លួន ហើយ​អាច​នឹង​ចូលរួមចំណែក​ជួយ​កសាង និង​អភិវឌ្ឍន៍​ប្រទេស​កំណើត​ខ្លួន​ផងដែរ​។​

​វត្តមាន​របស់​សម្តេច​តេ​ជោ ទទួលបាន​ការស្វាគមន៍​យ៉ាង​ច្រើន​កុះករ និង​ប្រកបដោយ​ក្តី​នឹករលឹក​ជាទីបំផុត​ពី​សំណាក់​ប្រជាពលរដ្ឋ​ខ្មែរ​នៅ​អឺរ៉ុប​៕