តោះ! មកស្គាល់ពីសួនផ្កា ៤កន្លែង ដែលបង្ហាញសម្រស់យ៉ាងផូរផង់នៅខេត្តបាត់ដំបង  

សួនផ្កាដ៏ស្រស់ស្អាត៤កន្លែង នៅក្នុងខេត្តបាត់ដំបង បានទាក់ទាញភ្ញៀវទេសចរជាច្រើន ព្រមទាំងបានជួយឱ្យពួកគេមានអារម្មណ៍ល្អ និងរីករាយនៅពេលបានបានឃើញ និងស្រូបក្លិនរបស់ផ្កាទាំងអស់នោះ។ តើអ្នកចង់ដឹងទេថា តើកន្លែងសួនផ្កាទាំង៤នោះ នៅទីណាខ្លះទៅ?

១.ចម្ការទំពាំងបាយជូរ និងសួនផ្កាស្រុករតនមណ្ឌល

សួនចម្ការទំពាំងបាយជូរ និងសួនផ្កាស្រុករតនមណ្ឌល ស្ថិតនៅក្នុងភូមិត្រែង ឃុំត្រែង ស្រុករតនមណ្ឌល ខេត្តបាត់ដំបង ធ្វើដំណើរតាមផ្លូវជាតិលេខ ៥៧ តាមផ្លូវទៅកាន់ខេត្តប៉ៃលិន នៅខាងស្តាំដៃ។ នៅទីនោះ មានជាចំការទំពាំងបាយជូរ ហើយក៏មានដាំជាផ្កាឡាវេនឌ័រ និងផ្កាចម្រុះពណ៌ជាច្រើនប្រភេទទៀតដែលអាចនាំអារម្មណ៍លោកអ្នកមានភាពរីករាយបាន។ មិនតែប៉ុណ្ណោះ ក៏មានស្រះទឹកយ៉ាងធំ និងមានលក់នូវទឹកទំពាំងបាយជូរ ដែលផលិតដោយស្នាដៃអ្នកបាត់ដំបងផ្ទាល់តែម្តង។

២.សួនផ្ការីករាយ ខេត្តបាត់ដំបង

មិនត្រឹមតែជាសួនផ្កា ដែលផ្តល់នូវរូបភាពស្រស់ស្អាតនោះទេ សួនផ្ការីករាយ ក៏មានជាការតុបតែង ស្លៀកសម្លៀកបំពាក់បែបបុរាណៗ មើលទៅពិតជាស្រស់ស្អាតមែនទែន។ សួនផ្កានេះ ក៏មានតុបតែងជាស្ពានផង ជាខ្ទមតូចមួយផង និងមានកន្លែងថតរូបជាច្រើន គួរឱ្យទាក់ទាញ។ សួនផ្ការីករាយ មានទីតាំងស្ថិតនៅ ភូមិអូរស្រឡៅ ឃុំវត្តតាម៉ីម ស្រុកសង្កែ ខេត្តបាត់ដំបង ដោយជិះហួសវត្តបួខ្នារ ប្រហែល១គីឡូម៉ែត្រ រួចបត់តាមផ្លូវដីក្រហម។

៣.ផ្ទះផ្កា

ប្រសិនជាលោកអ្នកធ្វើដំណើរទៅកម្សាន្តនៅភ្នំបាណន់ លោកអ្នកអាចឈាងចូលលេងផ្ទះផ្កានេះបាន ដែលស្ថិតនៅស្រុកបាណន់ និងផ្លូវទៅភ្នំបាណន់ផ្ទាល់តែម្តង។ នៅទីនោះ ត្រូវបានគេរៀបចំយ៉ាងស្រស់ស្អាតសម្រាប់ភ្ញៀវទេសចរនានា ហើយក៏មានការគាំទ្រច្រើនផងដែរ។

៤.សួនផ្កា ឡាអេសេវិន

សួនផ្កា ឡាអេសេវិន មានទីតាំងស្ថិតនៅ ជិតផ្សាពោធិវង្ស ក្រុងបាត់ដំបង ហើយតម្លៃសំបុត្រសម្រាប់ចូលទស្សនាក្នុងម្នាក់ៗគឺ ៤,០០០៛។ នៅសួនផ្កាឡាអេសេវិន ត្រូវបានគេរៀបចំ និងកែលំអជាមួយនឹងផ្ទះវីឡាពណ៌សមួយសម្រាប់ថតរូបលេងកម្សាន្ត ជាមួយនឹងការដាំដើមផ្កាដំណក់ភ្លៀង តម្រៀបគ្នា និងជាជួរៗ មើលទៅពិតជាស្រស់ស្អាតខ្លាំងណាស់។

ដូច្នេះ ប្រសិនជាលោកអ្នកដែលរស់នៅតំបន់នោះ ឬ បានទៅលេងខេត្តបាត់ដំបង សូមកុំភ្លេចចូលលេងសួនផ្កាទាំងនោះផង ព្រោះអាចឱ្យអ្នកមានអារម្មណ៍ស្រស់ស្រាយ និងមានអារម្មណ៍ល្អ ក្រោយបានស្រូបក្លិន និងឃើញពីសម្រស់ផ្កាទាំងនោះ៕

ដោយ៖ អុន ស្រីមាន