រឿង ៨ យ៉ាង ពីសត្វអំពិលអំពែកគូទភ្លឺ

សត្វអំពិលអំពែកគឺជាសត្វគួរឲ្យចាប់អារម្មណ៍ណាស់ ដោយសារគូទវាមានភ្លើងប្លែកខុសពីសត្វល្អិតផ្សេងៗ។ ក្រៅពីភ្លើងភ្លឺៗនៅគូទវា នៅមានរឿងប្លែកៗជាច្រើនទៀត គួរឲ្យចង់ដឹងពីសត្វអំពិលអំពែកដូចជា៖

១. ទាក់ទងគ្នាតាមរយៈភ្លើង

អំពិលអំពែកប្រើភ្លើងដើម្បីទំនាក់ទំនងទូទៅដូចជាការការពារទឹកដី គំរាមកំហែងសត្រូវ និងផ្ដល់សញ្ញាឲ្យសត្វឈ្មោលដែលវាពេញចិត្ត។

២. ផលិតភ្លើងត្រជាក់

១០០ភាគរយនៃថាមពលត្រូវបានបញ្ចេញជាពន្លឺ ចំណែកឯក្នុងកន្ទុយរបស់អំពិលអំពែកគេរកឃើញសារធាតុគីមីពីរគឺ Luciferase ជាអង់ស៊ីមដែលបង្កឱ្យមានពន្លឺ និងLuciferinដែលធន់នឹងកំដៅ ហើយបញ្ចេញពន្លឺនៅក្រោមលក្ខខណ្ឌណាមួយ។

៣. ពងភ្លឺ

ពងអំពិលអំពែកបញ្ចេញពន្លឺដើម្បីឆ្លើយតបទៅនឹងការរំញោចដូចជាការប៉ះ ឬ រំញ័រ។

៤. ស៉ីគ្នាឯង

អំពិលអំពែកជាសត្វស៉ីសាច់ជាអាហារ កូនដង្កូវរបស់វាស៉ីខ្យងនិងជន្លេន ចំណែកឯសត្វពេញវ័យវិញមិនដឹងជាស៊ីអីឲ្យប្រាកដទេ ប្រហែលជាស៉ីលំអងរុក្ខជាតិ ឬមិនស៉ីអ្វីសោះបើតាមការប៉ាន់ស្មានរបស់អ្នកវិទ្យាសាស្ត្រ។

៥. អាយុខ្លី

អំពិលអំពែកពេញវ័យមានអាយុសមល្មមដើម្បីបន្តពូជរួចស្លាប់ទៅវិញ ដោយសារតែអាយុខ្លីដូច្នេះមិនពិបាកស៊ីអ្វីទេ។

៦. មាននៅគ្រប់ទ្វីប

សត្វល្អិតដូចជាអំពិលអំពែកចូលចិត្តបរិយាកាសក្ដៅហើយសើមទើបពួកវាលូតលាស់នៅតំបន់ត្រូពិច និងចេញមកនៅរដូវក្តៅទៅគ្រប់ទ្វីបទាំងអស់លើកលែងតែអង់តាក់ទិកមួយ។

៧. មានប្រយោជន៍សម្រាប់វេជ្ជសាស្ត្រនិងវិទ្យាសាស្ត្រ

គេអាចប្រើសារធាតុគីមីពីសត្វអំពិលអំពែកចាក់ចូលទៅក្នុងកោសិកាជំងឺដើម្បីតាមដានការផ្លាស់ប្ដូរកោសិកាក្នុងការសិក្សាស្រាវជ្រាវជំងឺរួមមានជំងឺមហារីក និងជំងឺសាច់ដុំ។ក្រៅពីនេះធាតុគីមីរបស់វាត្រូវគេយកធ្វើជាឧបករណ៍រាវរកអេឡិចត្រូនិច បំពាក់ទៅក្នុងយានអវកាស ដើម្បីរកមើលជីវិតនៅក្នុងលំហខាងក្រៅ ក៏ដូចជាការបំផ្លាញអាហារ និងការចម្លងរោគបាក់តេរីនៅលើផែនដីផងដែរ។

៨. មានរសជាតិអត់ឆ្ងាញ់ទេ

កំឡុងពេលមានសត្វចង់ស៉ីវា អំពិលអំពែកនឹងសម្រក់ឈាមដែលមានរសជាតិល្វីងនិងពុលដល់សត្វមួយចំនួន។

គួររំលឹកដែរថា អំពិលអំពែកកំពុងប្រឈមមុខនឹងការគម្រាមកំហែងជាច្រើនដូចជា ការបាត់បង់ទីជម្រក ការបំពុលពន្លឺ ការប្រើប្រាស់ថ្នាំសម្លាប់សត្វល្អិត ការប្រែប្រួលអាកាសធាតុ គុណភាពទឹកមិនល្អ និងសត្វរាតត្បាតជីវិតវា៕

ប្រែសម្រួលដោយ៖ វារី

ចុចអាន៖ កំពូលសត្វល្អិតបង្កគ្រោះថ្នាក់ដល់ជីវិតមនុស្សទាំង ១០ គួរប្រុងប្រយ័ត្ន