ថៃ នៅតែសង្ឃឹម ខណៈបន្តស្វែងរកនាវិកបាត់ខ្លួនចំនួន ៣០នាក់

មេបញ្ជាការកងនាវាចរថៃបាននិយាយនៅថ្ងៃអង្គារទី២០ខែធ្នូនេះថា ការស្វែងរកផ្លូវអាកាស និងសមុទ្រ នៅតែបន្តរកនាវិកចំនួន៣០នាក់ ដែលបាត់ខ្លួនបន្ទាប់ពីនាវាចម្បាំង HTMS Sukhothai លិចក្នុងឈូងសមុទ្រថៃ កាលពីយប់ថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Adung Pan-iam បាននិយាយនៅថ្ងៃអង្គារនេះថា កងទ័ពជើងទឹក នៅតែមានក្តីសង្ឃឹមថា បុរសទាំងអស់នៅតែមានជីវិត។

លោកនិយាយថា “យើងនៅតែសង្ឃឹមថា នាវិកទាំង៣០នាក់គឺនៅរស់។ យើងនឹងបន្តការស្វែងរករបស់យើង ពីមួយថ្ងៃទៅមួយថ្ងៃ រហូតដល់យើងរកឃើញពួកគេ”។ លោកមេបញ្ជាការបន្តថា បុរសដែលបាត់ខ្លួនទាំង៣០នាក់ គឺជានាវិកនិងកងម៉ារីន ដែលចាត់ទៅនាវាចម្បាំង HTMS Sukhothai។

កាលពីថ្ងៃចន្ទ បុរស៣១នាក់ ត្រូវបានរាយការណ៍ថាបាត់ខ្លួន។ ក្រោយមកម្នាក់ ត្រូវបានជួយសង្គ្រោះពីសមុទ្រដោយនាវាចម្បាំង HTMS Kraburi ក្នុងខេត្ត Prachuap Khiri Khan។

ទាហានជើងទឹក បានចាកចេញពីមូលដ្ឋានទ័ពជើងទឹក Satathip ក្នុងខេត្ត Chon Buri។ មួយថ្ងៃក្រោយមក នាវារបស់ពួកគេ បានប្រឈមមុខនឹងអ្វីដែលមេបញ្ជាការរបស់ពួកគេពិពណ៌នាថាជា ស្ថានភាពទឹកសមុទ្រដ៏អាក្រក់បំផុត​ មិនធ្លាប់ឃើញក្នុងរយៈពេលមួយទសវត្សរ៍មកនេះ។

មេបញ្ជាការកងនាវាចរថៃ និយាយថា ឧបទ្ទវហេតុនេះ កើតឡើងលឿនពេក​ ធ្វើឲ្យពួកគេរៀបចំខ្លួនមិនទាន់ពេលវេលា។

ក្នុងចំណោមមនុស្សចំនួន១០៦នាក់នៅលើនាវា HTMS Sukhothai គឺមានប្រហែល៧០នាក់ជានាវិកកងទ័ពជើងទឹក រួមជាមួយនឹងទាហានម៉ារីន និងបុគ្គលិកប្រហែល៣០នាក់មកពីបញ្ជាការការពារដែនអាកាស និងឆ្នេរសមុទ្រ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ លិចនាវាចម្បាំងថៃ កងម៉ារីនចំនួន៣៣នាក់ កំពុងបាត់ខ្លួន