ព័ត៌មានជាតិ

រដ្ឋមន្ត្រីពាណិជ្ជកម្ម ស្នើកូរ៉េ ជួយជំរុញវិនិយោគិនកូរ៉េមកបណ្ដាក់ទុនលើវិស័យឧស្សាហកម្មយានយន្តនៅកម្ពុជា

បានផុស

២ years មុន

នៅ

ថ្ងៃពុធ ២១ ធ្នូ ២០២២

ដោយ

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានស្នើភាគីកូរ៉េ ជួយជំរុញលើកទឹកចិត្តអ្នកវិនិយោគិន និងធុរជនកូរ៉េ ឲ្យមកបណ្ដាក់ទុននៅកម្ពុជាឲ្យបានច្រើនបន្ថែមទៀត ជាពិសេសទៅលើអាជីវកម្មផលិតកែច្នៃ និងឧស្សាហកម្មយានយន្តដែលកម្ពុជាកំពុងមានសក្ដានុពលខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញនេះបានធ្វើនៅក្នុងឱកាសអនុញ្ញាតឲ្យលោក PARK HEUNG-KYENONG ឯកអគ្គរដ្ឋទូតសាធារណរដ្ឋកូរ៉េដែលត្រូវចប់អាណត្តិនៅកម្ពុជាចូលជួបសំដែងការគួរសម និងជម្រាបលា កាលពីរសៀលថ្ងៃទី ២០ ធ្នូ នៅទីស្ដីការក្រសួង។

លោករដ្ឋមន្ត្រី បានជម្រាបជូន ឯកអគ្គរដ្ឋទូតកូរ៉េ ថា តាមរយៈច្បាប់វិនិយោគថ្មីរបស់កម្ពុជា មានការលើកទឹកចិត្តច្រើនដល់ការផលិតកែច្នៃ និងឧស្សាហកម្មយានយន្ត នេះ។

លោករដ្ឋមន្ត្រី បានសម្ដែងនូវក្ដីរីករាយដោយបានឃើញទំហំពាណិជ្ជកម្មទ្វេភាគីរវាងប្រទេសទាំងពីរហាក់មានផលវិជ្ជមាន គួរឲ្យកត់សម្គាល់ គឺមានការកើនឡើងដល់ទំហំទឹកប្រាក់ប្រមាណ ៧៧២ លានដុល្លារអាមេរិក ក្នុងឆ្នាំ ២០២០ គឺមានកំណើនប្រមាណ ៦% បើធៀបទៅនឹងឆ្នាំ ២០១៩ សម្រេចបានត្រឹមតែ ៧២៩ លានដុល្លារអាមេរិក។

លោករដ្ឋមន្ត្រីបានបន្តទៀតថា «ហើយអ្វីដែលពិសេសទៀតនោះ បន្ទាប់ពីកិច្ចព្រមព្រៀងពាណិជ្ជកម្មសេរីទ្វេភាគីបានចូលជាធរមានចាប់ពីដើមខែមករា ឆ្នាំ ២០២២ នេះមក នៅក្នុងរយៈពេល ១០ ខែ ក្នុងឆ្នាំ ២០២២ នេះ ទំហំពាណិជ្ជកម្មសម្រេចបាន ៦៥៩ លានដុល្លារអាមេរិក កើនឡើងដល់ ៤% បើធៀបនឹងរយៈពេលដូចគ្នាក្នុងឆ្នាំ ២០២១។ ហើយគ្រាន់តែពីរសប្ដាហ៍ក្នុងខែធ្នូ ឆ្នាំ ២០២២ ទំហំពាណិជ្ជកម្មរវាងប្រទេសទាំងពីរសម្រេចបាន ០,៥ លានដុល្លារអាមេរិក»។

លោក PARK HEUNG-KYENONG ឯកអគ្គរដ្ឋទូតសាធារណរដ្ឋកូរ៉េ បង្ហាញនូវជំនឿចិត្តថា ការចូល ជាធរមាន នៃកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ និងកិច្ចព្រមព្រៀងមិនយកពន្ធត្រួតគ្នា នឹងបង្កើនទំនុកចិត្ត និងជំរុញបន្ថែមទៀតនូវការវិនិយោគ និងធុរកិច្ចកូរ៉េ។

ភាគីទាំងពីរក៏បានបញ្ជាក់សាជាថ្មីនូវការប្ដេជ្ញាចិត្តបន្តកិច្ចសហប្រតិបត្តិការឲ្យកាន់តែជិតស្និទ្ធ សំដៅពង្រឹង ពង្រីក និងជំរុញទំនាក់ទំនងសេដ្ឋកិច្ច-ពាណិជ្ជកម្ម និងវិនិយោគ រវាងប្រទេសទាំងពីរ ឲ្យកាន់តែរីកចម្រើនបន្ថែមទៀត៕

អត្ថបទ ៖ សំអឿន