ក្រុមតាលីបង់ ហាមឃាត់ស្ត្រីអាហ្វហ្គានីស្ថាន មិនឲ្យចូលរៀនសាកលវិទ្យាល័យ

អ្នកនាំពាក្យរដ្ឋាភិបាលតាលីបង់ បាននិយាយកាលពីថ្ងៃអង្គារទី២០ខែធ្នូថា សិស្សស្រី ត្រូវបានហាមឃាត់មិនឲ្យចូលរៀននៅសាកលវិទ្យាល័យឯកជន និងរដ្ឋក្នុងប្រទេសអាហ្វហ្គានីស្ថាន ដោយបម្រាមនេះ ចូលជាធរមានភ្លាមៗ និងបន្តរហូតដល់មានការជូនដំណឹងបន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើកាលពីដំបូងមានការសន្យាថា នឹងបង្កើតច្បាប់សមរម្យដែលគោរពសិទ្ធិនារី និងជនជាតិភាគតិចក៏ដោយ ប៉ុន្តែក្រុមតាលីបង់បានអនុវត្តយ៉ាងទូលំទូលាយនូវច្បាប់ឥស្លាម ឬ Sharia ដ៏តឹងរ៉ឹង។

ពួកគេ​បាន​ហាមប្រាម​កុមារី​ពី​សាលា​មធ្យមសិក្សា និង​វិទ្យាល័យ, រឹតត្បិត​ស្ត្រី​ពី​ការងារ​ភាគច្រើន ហើយ​បាន​បញ្ជា​ឲ្យ​ពួកគេ​ស្លៀកពាក់បិទជិត​ពី​ក្បាល​ដល់​ចុងជើង​នៅតាម​ទីសាធារណៈ។ ស្ត្រី ​ក៏​ត្រូវ​បាន​ហាម​ឃាត់​មិន​ឲ្យ​ចូល​ក្នុង​សួន​ច្បារ និង​កន្លែង​ហាត់ប្រាណផង​ដែរ។

សេចក្តីសម្រេច​នេះ ​ត្រូវ​បាន​ប្រកាស​បន្ទាប់​ពី​កិច្ច​ប្រជុំ​របស់​រដ្ឋាភិបាល។ លិខិតមួយច្បាប់ចែករំលែកដោយអ្នកនាំពាក្យក្រសួងឧត្តមសិក្សា លោក Ziaullah Hashmi បានប្រាប់សាកលវិទ្យាល័យឯកជន និងរដ្ឋឲ្យអនុវត្តបម្រាមនេះឲ្យបានឆាប់តាមដែលអាចធ្វើទៅបាន។

គួរបញ្ជាក់ថា ក្រុមតាលីបង់ ត្រូវបានក្រុមចម្រុះដឹកនាំដោយសហរដ្ឋអាមេរិក បណ្តេញចេញពីអំណាចក្នុងឆ្នាំ២០០១ ព្រោះតែពួកគេផ្តល់ជម្រកដល់មេដឹកនាំអាល់កៃដា លោក Osama bin Laden ប៉ុន្តែក្រុមនេះ បានវិលត្រឡប់មកកាន់អំណាចវិញ បន្ទាប់ពីការចាកចេញដ៏វឹកវររបស់កងទ័ពអាមេរិកកាលពីឆ្នាំមុន៕

ប្រែសម្រួល៖ Vann Vann

ប្រភព៖ NPR

ចុចអាន៖ តាលីបង់ អំពាវនាវសុំជំនួយពីអន្តរជាតិ ខណៈអ្នកស្លាប់ក្នុងគ្រោះរញ្ជួយដី កើនលើស ១០០០នាក់