ជិតដាច់ឆ្នាំ រដ្ឋមន្រ្តីសេដ្ឋកិច្ច ចុះហត្ថលេខាលើកិច្ចព្រមព្រៀង​ហិរញ្ញប្បទាន៦គម្រោង​ទំហំទឹកប្រាក់ជាង ៣៨០លានដុល្លារ

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួង​សេដ្ឋកិច្ច និងហិរញ្ញវត្ថុ បានចុះហត្ថលេខាលើកិច្ចព្រមព្រៀង​ហិរញ្ញប្បទាន​​សហប្រតិបត្តិការ​សម្រាប់គម្រោង/កម្មវិធីចំនួន ៦ ជាមួយលោក Jacques Pellet ឯកអគ្គរដ្ឋទូត បារាំងប្រចាំកម្ពុជា លោកស្រី Jyotsana Varma នាយកស្ថានតំណាងរបស់ ADB ប្រចាំនៅកម្ពុជា​ និងលោកស្រី Sandrine Boucher នាយកស្ថានតំណាងរបស់ AFD ប្រចាំនៅកម្ពុជាបាន ដែលមានទឹកប្រាក់សរុបចំនួន ៣៨១,៤៥លានដុល្លារអាមេរិក និង​ហិរញ្ញ​ប្បទាន​​​ជំនួយបច្ចេកទេសចំនួន ០១ ដែលមានទឹកប្រាក់ចំនួន ១,៧លាន​ដុលា្លរ​​អាមេរិក​ សម្រាប់គាំទ្រដល់ដំណើរការអនុវត្តកម្មវិធី​​អភិវឌ្ឍន៍​​វិស័យ​​ថាមពល​។

ចំពោះគម្រោងទាំង៦ ដែលបានចុះហត្ថលេខានៅថ្ងៃទី ២២ ខែ ធ្នូនេះ រួមមាន៖

១. កម្មវិធីអភិវឌ្ឍន៍វិស័យថាមពល- អនុកម្មវិធីទី១ មានគោលបំណងរួមចំណែកគាំទ្រកម្ពុជាក្នុងការ​ផ្លាស់ប្តូរ​ទៅប្រើប្រាស់​ថាមពលស្អាត ដែលនឹង​ជំរុញកំណើន​សេដ្ឋកិច្ច​ប្រកបដោយនិរន្តរភាព,​ ជំរុញល្បឿន​នៃ​ការប្រែ​​ក្លាយ​ទៅ​ជា​សេដ្ឋកិច្ច បៃតង និងកាត់បន្ថយការបញ្ចេញកាបូន ព្រមទាំងជំរុញការវិនិយោគប្រកបដោយភាពប្រកួតប្រជែង ​ក្នុងវិស័យ​ថាមពល តាម​រយៈ​​យន្តការភាពជាដៃគូរវាងរដ្ឋ និងឯកជន។

២. គម្រោងជលផលសមុទ្រ និងតំបន់ឆ្នេរប្រកបដោយចីរភាព មានគោលបំណងអភិវឌ្ឍស្ថាប័ន និងហេដ្ឋា​រចនា សម្ព័ន្ធតំបន់សមុទ្រ ដើម្បីលើកកម្ពស់ផលិតភាពផលនេសាទសមុទ្រ, ពិពិធកម្មជីវភាពប្រជា​នេសាទ​ដែលធន់នឹង​អាកាស ធាតុ​, ជំរុញការអភិវឌ្ឍប្រកបដោយនិរន្តរភាព និងជំរុញពាណិជ្ជូបនីយ​កម្ម​ផល​នេសាទ​សមុទ្រ។

៣. គម្រោងសុខភាពសត្វឆ្លងកាត់​ព្រំដែន និងការជំរុញខ្សែច្រវាក់តម្លៃសត្វ មានគោលបំណងចម្បង ២ គឺ៖ ទី១.​លើក​កម្ពស់ផលិតភាព, គុណភាព, ពាណិជ្ជកម្ម, ពិពិធកម្ម និងពង្រីក​ការចិញ្ចឹមសត្វ និងកែច្នៃ​ផលិត​ផលបសុ​សត្វ​ស្រប​តាមក្របខណ្ឌនៃផែនការយុទ្ធសាស្រ្តសម្រាប់​ការអភិវឌ្ឍ​បសុ​​សត្វ​​ឆ្នាំ​២០១៦-២០២៥ និង ទី២.​លើកកម្ពស់​សុខ​ភាព​​​បសុ​សត្វ និង ពង្រីកហេដ្ឋារចនាសម្ព័ន្ធខ្សែ​ច្រវាក់​តម្លៃ​​​ប្រកប​​​ដោយភាតរៈបរិស្ថាន។

៤. គម្រោងសុខភាពតាមតំបន់ព្រំដែនក្នុងមហាអនុតំបន់មេគង្គ មានគោលបំណងលើកកម្ពស់​ការទទួលបាន សេវា​​សុខាភិបាលរបស់ប្រជាជនដែលរស់នៅតាមព្រំដែន និងប្រជាជនចំណាកស្រុកឆ្លងកាត់ព្រំដែនមួយចំនួន ដោយផ្តោត ជាចម្បងលើការពង្រឹងគុណភាពនៃការផ្តល់សេវាសុខាភិបាល និង ការគាំពារ​ហិរញ្ញវត្ថុ​​សម្រាប់​សេវាថែទាំ​សុខភាពជូន​ប្រជាជនចំណាកស្រុក។

៥. កម្មវិធីអភិវឌ្ឍន៍វិស័យពាណិជ្ជកម្ម និងការប្រកួតប្រជែង–អនុកម្មវិធីទី១ មានគោលបំណងជំរុញ​ប្រសិទ្ធភាព​ពាណិជ្ជកម្ម និងភាពប្រកួតប្រជែងនៅកម្ពុជា ដោយផ្តោតជាចម្បងលើកត្តាចំនួន ៣ មានជាអាទិ៍ៈ​ ទី១.ការលើកកម្ពស់​បរិយា​កាសអនុគ្រោះសម្រាប់ការវិនិយោគ និងការធ្វើធុរកិច្ច, ទី២.ជំរុញការរីក​លូត​លាស់​នៃសហគ្រាស​ខ្នាតតូច និង​មធ្យម, និង ទី៣.កែលម្អគោល​នយោ​បាយពាណិជ្ជកម្ម និងកិច្ចសម្រួល​ពាណិជ្ជ​កម្ម។

៦. គម្រោងវិទ្យាសាស្រ្ត និងបច្ចេកវិទ្យាសម្រាប់ការអប់រំកម្រិតមធ្យមសិក្សា មានគោល​បំណង​លើក​កម្ពស់​​គុណភាព និងប្រសិទ្ធភាពការអប់រំថ្នាក់មធ្យមសិក្សាទុតិយភូមិ ដោយផ្តោតជាចម្បងលើកត្តាចំនួន ៣ មានជាអាទិ៍ៈ ទី១. ការ​ពង្រីកវិសាលភាពនៃការអប់រំកម្រិតមធ្យមសិក្សាទុតិយភូមិតាមស្តង់ដារ និងប្រកបដោយសមធម៌, ទី២.ការ​ពង្រឹង​​​គុណភាព នៃការអប់រំវិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា និង ទី៣.ការលើកកម្ពស់​ស្ថាប័​ន​ក្នុង​ការធ្វើផែនការ, ការគ្រប់គ្រង និងការបង្រៀន។

 នៅក្នុងពិធីចុះកិច្ចព្រមព្រៀងនេះ លោក អូន ព័ន្ធមុនីរ័ត្ន បានរំលឹកអំពីកិច្ចសហប្រតិបត្តិការ ADB ដែល​បានផ្តល់​ហិរញ្ញប្បទានសហប្រតិបត្តិការសរុបចំនួនប្រមាណ ៤,៧៧ប៊ីលានដុល្លារអាមរិក ដែលក្នុងនោះ ឥណទានសម្បទាន មានទឹកប្រាក់សរុបចំនួនប្រមាណ ៤,២០ ប៊ីលាន​ដុល្លារ​ សម្រាប់អនវុត្តគម្រោង/កម្មវិធីចំនួន ១៣០ និងហិរញ្ញប្បទាន​ឥតសំណងមានទឹកប្រាក់សរុបចំនួនប្រមាណ ៥៦៨,៤៥លានដុល្លារ​អាមរិកសម្រាប់អនុវត្តគម្រោង/កម្មវិធីចំនួន ៦៩។

លោករដ្ឋមន្រ្តីក្រសួងសេដ្ឋកិច្ច ក៏បានអរគុណចំពោះការផ្តល់​ហិរញ្ញប្បទាន​សហប្រតិ-​បត្តិ​ការ​របស់ ADB និង AFD ដែលបាននិងកំពុង​រួមចំណែក​យ៉ាង​​ធំធេង​​ក្នុង​ការ​អភិ​វឌ្ឍ​​នៅកម្ពុជា និងបន្ត​ដើរតួនាទី​ជា​ដៃគូអភិវឌ្ឍន៍កាន់តែសំខាន់ ហើយអាចក្លាយខ្លួន​ជា​ដៃគូ​​អភិវឌ្ឍន៍​ពហុភាគីធំបំផុតរបស់រាជ​រដ្ឋាភិ​បាល​​​កម្ពុជា៕