លោក Zelensky ប្រកាសថា អ៊ុយក្រែន ជាមេដឹកនាំ ពិភពលោកសេរី (មានវីដេអូ)

នៅក្នុងសុន្ទកថាទៅកាន់សភាប្រចាំឆ្នាំ លោកប្រធានាធិបតី Volodymyr Zelensky បាននិយាយថា ប្រទេសអ៊ុយក្រែនបានក្លាយជា “មេដឹកនាំមួយនៃពិភពលោកសេរី”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់សភាអ៊ុយក្រែននៅថ្ងៃព្រហស្បតិ៍ទី២៩ខែធ្នូនេះថា “យើងបានជួយលោកខាងលិចឲ្យរកឃើញខ្លួនឯងម្តងទៀត។ នៅទីនោះ គ្មាននរណាខ្លាចរុស្ស៊ីទៀតទេ”។

ស្របពេលជាមួយគ្នានោះ លោកបានជំរុញឲ្យមានកំណែទម្រង់ដល់អង្គការអន្តរជាតិដែលមានស្រាប់។ ពួកគេត្រូវតែធានាសន្តិភាព បង្កើតតុលាការសម្រាប់ប្រទេសរុស្ស៊ី និងការធានាសន្តិសុខថ្មីសម្រាប់អ៊ុយក្រែន។

លោក Zelensky និយាយថា អ៊ុយក្រែនកំពុងឈានទៅរកការទទួលជ័យជម្នះ ដែលមនុស្សគ្រប់ជំនាន់កំពុងស្រមៃចង់បាន បើទោះបីជារុស្ស៊ី វាយប្រហារលើហេដ្ឋារចនាសម្ព័ន្ធថាមពលរបស់ខ្លួនក៏ដោយ។ លោកកត់សម្គាល់ថា កងទ័ពអ៊ុយក្រែន ដណ្តើមយកបានក្រុងនិងភូមិជាង ១៨០០មកវិញហើយ រីឯចំនួនផ្កាយរណប Starlink ដែលធ្វើការដើម្បីផលប្រយោជន៍របស់អ៊ុយក្រែន នឹងឈានដល់ ៣០ ០០០ ក្នុងពេលឆាប់ៗនេះ។

លោក Zelensky បន្តថា គោលដៅចម្បងគឺដណ្តើមមកវិញនូវបូរណភាពទឹកដីរបស់អ៊ុយក្រែន និងការរំដោះអ្នកទោសសង្គ្រាមទាំងអស់។

ការ​ស្ដារ​អ៊ុយក្រែន​ក្រោយ​សង្គ្រាម ​នឹង​ក្លាយ​ជាគម្រោង​សេដ្ឋកិច្ច​ធំ​បំផុត​នៅ​អឺរ៉ុប។ ទឹកដីទាំងមូលត្រូវតែយកមកវិញ ហើយអាទិភាពនឹងត្រូវបានផ្តល់ទៅឲ្យក្រុមហ៊ុនទាំងឡាយណា ដែលធ្វើការនៅអ៊ុយក្រែនក្នុងអំឡុងពេលសង្រ្គាម ហើយការធ្វើមាតុភូមិនិវត្តន៍ជនភៀសខ្លួន គឺជាគោលដៅមួយផ្សេងទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ AA

ចុចអាន៖ រុស្ស៊ី ទស្សន៍ទាយថា ឆ្នាំក្រោយ លោកខាងលិចនឹងផ្ទុះសង្គ្រាម ហើយ Elon Musk ក្លាយជាប្រធានាធិបតីអាមេរិក