ម៉ាស៊ីនស្ទូងស្រូវខ្នាតតូចតម្លៃជាង ១ ពាន់ដុល្លារ ជួយកាត់បន្ថយការចំណាយរបស់កសិករ

ម៉ាស៊ីនស្ទូងស្រូវ​ខ្នាតតូចដែលជាផលិតផលរបស់ខ្មែរកំពុងដាក់សាកល្បងមានសក្តានុពលជួយដល់កសិករក្នុងការកាត់បន្ថយថ្លៃដើមផលិតស្រូវដូចជាកាត់បន្ថយ​ចំណាយពូជ ថ្នាំស្មៅ និងបង្កើនទិន្នផល។

ម៉ាស៊ីនស្ទូងស្រូវនេះ​ជាផលិតផលរបស់ក្រុមហ៊ុន AgriSmart Innovation ស្ថិតនៅក្នុងភូមិព្រែក​តាឡុង២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

លោក សាក់ ជឿន ​អ្នកផ្សព្វផ្សាយ​ផលិតផលឱ្យក្រុមហ៊ុន AgriSmart Innovation បានប្រាប់ឱ្យដឹងថា ម៉ាស៊ីនស្ទូងស្រូវខ្នាតតូចមានភាពស័ក្ដិសមសម្រាប់កសិករដោយសារវាមាន​តម្លៃ​ថោកសម​រម្យ​ត្រឹមតែ ១ ២៥០ ដុល្លារ ក្នុង១ គ្រឿង និងមានលក្ខណៈតូចសមស្របជាមួយកសិករ​ដែលមានស្រែតិច​។

លោកថា ការព្រោះស្រូវដោយដៃនាបច្ចុប្បន្នមានបញ្ហា​ដោយសារពេលដែលអត់ទឹកនៅក្នុងស្រែគឺអត់ទឹកតែម្ដង ហើយពេលដែលមានទឹកគឺមានទឹកជ្រុល ដូច្នេះ ​ពេលដែលមានទឹកច្រើន ស្រែកសិករមិនអាចព្រោះបានទេ ​គាត់​ត្រូវតែស្ទូង។

ការបង្កើតម៉ាស៊ីនស្ទូងខ្នាតតូច ​ជាឱកាសសម្រាប់កសិករដែលគាត់​ធ្វើស្រែទៅតាមកាលៈទេសៈ។ ម្យ៉ាងទៀត ស្រូវដែលធ្វើដោយស្ទូង និងស្រូវព្រោះគុណភាពខុសគ្នាពីព្រោះស្រូវដែលធ្វើដោយព្រោះអាចកើតជំងឺច្រើន​ ខណៈស្រូវ​សន្ទូងមិនសូវកើតជំងឺទេ​ដោយសារ​វាមានចន្លោះ​ពន្លឺថ្ងៃចូលគ្រប់គ្រាន់​ក្នុងការសម្លាប់​ពពួកសត្វល្អិតផង​ និងពពួកជំងឺ ជាពិសេស​ជំងឺផ្សិត​។

បើតាមលោក សាក់ ជឿន៖ «បើទិញ​ម៉ាស៊ីនធំវាអាចតម្លៃ​រហូតទៅ​ដល់ ៣ ៥០០០ ដុល្លារ ​ប៉ុន្តែម៉ាស៊ីនតូចនេះ កសិករដែលមានម៉ាស៊ីនអាចផ្ដល់សេវា​ទៅអ្នក​ជិតខាង​បាន​ផងដែរ ខណៈដែលគ្រឿងបន្លាស់មាននៅក្នុងស្រុកស្រាប់»៕

អត្ថបទ៖ ឡេង ដេត