Ronaldo ជាប់បម្រាម មិនអាចចូលលេងឲ្យក្លិប Al-Nassr រហូតដល់ ២ប្រកួតដំបូង

កីឡាករ Cristiano Ronaldo ត្រូវ​បានហាមឃាត់​ពី​ការ​បង្ហាញ​ខ្លួន​ជា​លើក​ដំបូងឲ្យ​ក្រុម Al-Nassr ពោលគឺត្រឹម​តែ២៤ម៉ោងប៉ុណ្ណោះ ​មុន​ការ​ប្រកួត​ដំបូង​របស់​គាត់នៅអារ៉ាប៊ីសាអូឌីត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្សែប្រយុទ្ធវ័យ៣៧ឆ្នាំរូបនេះ ត្រូវបានគេរំពឹងថា នឹងចូលលេងក្នុងជំនួបជាមួយ Al Ta’ee សម្រាប់ការប្រកួតដំបូងរបស់គាត់ឲ្យ Al-Nassr ក្នុងរាត្រីនេះ បន្ទាប់ពីការចុះកិច្ចសន្យា តម្លៃពលកម្ម១៧៣លានផោនក្នុងមួយឆ្នាំ។

ទោះបីជាយ៉ាងណាក៏ដោយ Ronaldo ត្រូវបានសហព័ន្ធបាល់ទាត់អង់គ្លេស (FA) រកឃើញថា មានកំហុសពីបទប្រព្រឹត្តអំពើមិនសមរម្យ និងហិង្សាកាលពីខែវិច្ឆិកា ពោលគឺប៉ុន្មានថ្ងៃ មុនពេលកិច្ចសន្យានៅ Manchester United របស់គាត់ត្រូវបានបញ្ចប់ ពាក់ព័ន្ធការវាយទូរស័ព្ទចេញពីដៃអ្នកគាំទ្រ Everton ម្នាក់។

FA បានពិន័យ Ronaldo ជាទឹកប្រាក់ចំនួន៥០០០០ផោន និងដាក់បម្រាមមិនឲ្យចូលលេង២ប្រកួត ប៉ុន្តែគាត់មិនទាន់អនុវត្តបម្រាមនេះទេ ដោយសារកិច្ចសន្យារបស់គាត់នៅ Man Utd ត្រូវបានបញ្ចប់នៅប៉ុន្មានថ្ងៃក្រោយមក។

ដូច្នេះ បម្រាមនេះ នឹងបន្តទៅក្នុងក្របខ័ណ្ឌអារ៉ាប៊ីសាអូឌីត ហើយ Ronaldo នឹងត្រូវអង្គុយមើលចំនួនពីរប្រកួតទល់នឹង Al-Ta’ee និង Al-Shabab។

គួរបញ្ជាក់ថា យោងតាមមាត្រា ១២.១ នៃបទប្បញ្ញត្តិរបស់ FIFA ស្តីពីស្ថានភាព និងការផ្ទេរកីឡាករ បានចែងថា “ការដាក់ទណ្ឌកម្មវិន័យណាមួយដែលមានរហូតដល់៤ប្រកួត ឬរហូតដល់៣ខែ ដែលត្រូវបានដាក់លើកីឡាករដោយអតីតសហព័ន្ធមួយ ប៉ុន្តែមិនទាន់ត្រូវបានអនុវត្តក្នុងពេលវេលានៃការផ្ទេរ គឺនឹងត្រូវបន្តជាប់ទណ្ឌកម្មដោយសហព័ន្ធថ្មីដែលកីឡាករម្នាក់បានចុះឈ្មោះជាមួយ”៕

ប្រែសម្រួល៖ Vann Vann

ប្រភព៖ Yahoo

ចុចអាន៖ ទស្សនាវីដេអូ Ronaldo បង្ហាញខ្លួនជាផ្លូវការនៅក្លិប Al Nassr កក្រើកឋានទាំង៣