សម្ដេចតេជោ ហ៊ុន សែន៖ វីរុសកូវីដបំប្លែងថ្មី XBB.1.5 មិនប្រាកដចូលមក ​តែពលរដ្ឋត្រូវចាក់វ៉ាក់សាំងដូសជំរុញ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានទទូច​ឱ្យប្រជាពលរដ្ឋ​ទាំងអស់បន្តយកចិត្តទុកដាក់ចំពោះជំងឺកូវីដ១៩ ដែលអាចបន្តកើតមានឡើង ខណៈដែលវីរុសបំប្លែងខ្លួនថ្មីជាច្រើនកំពុងរាត្បាតជាសកល​។

សម្ដេចតេជោ ហ៊ុន សែន មានប្រសាសន៍នៅក្នុងពិធីបើកការដ្ឋានសាងសង់ពង្រីក និងលើកកម្រិតកំណាត់ផ្លូវជាតិ​លេខ៧ នៅថ្ងៃទី ០៩ ខែមករា ឆ្នាំ ២០២៣នេះ ដោយសម្ដេចជំរុញឱ្យប្រជាពលរដ្ឋបន្តទទួលយកវ៉ាក់សាំង​ដែលត្រូវចាក់ដូសជំរុញដើម្បភាពស៊ាំនៅក្នុងខ្លួន។

សម្ដេចតេជោ ហ៊ុន សែន ថ្លែងថា៖ «ព្រោះឥឡូវ​មានអាបំប្លែងថ្មី XBB ហើយមិនដឹងថា ទៅខាងមុខវាចេញអ្វីទៀត ហើយ XBB មិនទាន់ចូលមកដល់ស្រុកខ្មែរច្រើនទេ យើងមិនប្រាដកថា វាចូលមក ឬមិនចូលទេ ប៉ុន្តែមានជនជាតិកម្ពុជា ដែលរស់នៅប្រទេសក្រៅបានកើតវាស្រេចរួចទៅហើយ»។

សម្ដេចតេជោ ហ៊ុន សែន បញ្ជាក់ថា យើងមិនដឹងថា ជំងឺកូវីដ១៩ អាចប្រែក្លាយទៅជាមេរោគអ្វីដទៃទៀត។ ដូច្នេះ!បានជាចាំបាច់ត្រូវអំពាវនាវចំពោះប្រជាពលរដ្ឋឱ្យ​ទទួលយកវ៉ាក់សាំងបន្តទៅទៀត កុំឱ្យហួសពេលដល់សង្គ្រោះលែងបាន ទើបស្ដាយក្រោយ។

អង្គការសុខភាពពិភពលោក (WHO) កាលពីពេលថ្មីៗនេះបានឱ្យដឹងថា វីរុសបំប្លែងខ្លួនចុងក្រោយបំផុតនេះ ដែលក្លាយពូជពី អូមីក្រុង ហើយមានឈ្មោះជាផ្លូវការថា XBB.1.5 បានវាយប្រហាររួចទៅហើយក្នុងសហរដ្ឋអាមេរិក។

XBB.1.5 ក៏​ត្រូវ​បាន​គេ​រក​ឃើញ​នៅ​ក្នុង​ប្រទេសមួយចំនួនទៀតផងដែរ ​រួម​មាន​​បារាំង អាល្លឺម៉ង់ ហូឡង់ អេស្ប៉ាញ អៀរឡង់ អូស្ត្រាលី សិង្ហបុរី និង​ឥណ្ឌា៕

អត្ថបទ៖ ឡេង ដេត