លីវ ជីលី មោទកភាពឃើញសិស្សប្អូន ឃឿន ប៉ូលីកា និង ឌៀប សុហ្វៀរ៉ា ឈ្នះមកុដលើឆាកអន្តរជាតិ

កញ្ញា លីវ ជីលី ជា​រៀមច្បង​ក្នុង​វិស័យ​ដើរ​ម៉ូដ​របស់​កម្ពុជា ក្រោយ​ដឹង​ថា សិស្ស​ប្អូន​ពីរ​រូប​ដែល​ជា​ទំពាំង​ស្នង​សម្រាប់​វិស័យ​មួយ​នេះ​នា​ពេល​អនាគត​ទទួល​បាន​ជោគជ័យ​យ៉ាង​ល្អ​ក្នុង​ការ​ប្រកួត​លើ​ឆាក​អន្តរជាតិ ភ្លាមៗ​នេះ នាង​បាន​បង្ហាញ​អំពី​មោទកភាព​ជា​ខ្លាំង។

បវរកញ្ញា លីវ ជីលី កាលពី​ថ្ងៃ​ទី ០៩ ខែ​មករា ឆ្នាំ ២០២៣ បាន​សម្ដែង​ការ​អបអរសាទរ​ទៅកាន់​អ្នក​ទាំងពីរ​ដូច្នេះ​ថា ខ្មែរ​យើង​ពិត​ជា​មាន​មោទកភាព​ខ្លាំង​ណាស់ ប្អូនៗ គឺជា​ទំពាំង​ដ៏​ល្អ​របស់​ប្រទេស​ជាតិ​យើង។ ក្នុង​នោះ​កញ្ញា លីវ ជីលី ដែល​ជា​សិស្ស​ច្បង បាន​បញ្ជាក់​ថា ១.​អបអរសាទរ​អូន Polika Khoeun ( ឃឿន ប៉ូលីកា​) ដែល​បាន​ឈ្នះ​មកុដ The Winner Miss Preteen Junior Idol World 2023។ បង​មើល​ឃើញ​សមត្ថភាព​អូន​តាំងពី​ចូល​ប្រកួត​នៅ​ខ្មែរ​ម្ល៉េះ ឥឡូវ​អូន​ពិតជា​ទទួល​បាន​មកុដ​ពិតមែន​អបអរសាទរ។ ២.អបអរសាទរ​ទៅកាន់​អូន Sofira Deab ( ឌៀប សុ​ហ្វៀ​រ៉ា​) ដែល​ទទួល​បាន​មកុដ​លំដាប់​រង​ទី ២ The 2nd Runer up of Little Miss junior Idol world 2023។

សូម​បញ្ជាក់​ដែរ​ថា បវរកញ្ញា​វ័យក្មេង​របស់​កម្ពុជា​ដំបូង​គេ គឺ ឃឿន ប៉ូលីកា ដណ្តើម​បាន​មកុដ Miss Preteen Junior Idol World2023 លើ​ឆាក​អន្តរជាតិ​ក្នុង​វគ្គ​ផ្ដាច់ព្រ័ត្រ​កាលពី​រាត្រី​ថ្ងៃ​ទី ០៨ ខែ​មករា ឆ្នាំ ២០២៣ ដែល​ប្រព្រឹត្ត​ឡើង​នៅ​លើ​ទឹកដី​ប្រទេស​ថៃ។ ចំណែក​ឯ ឌៀប សុហ្វៀរ៉ា ក៏​ទទួល​បាន​មកុដ​លំដាប់​រង​ទី ២Little Miss junior Idol world 2023 ផង​ដែរ៕

អត្ថបទ ៖ ចាន់រ៉ា