រាជរដ្ឋាភិបាល ពិភាក្សា និងផ្សព្វផ្សាយពី«យុទ្ធសាស្រ្ត​នយោបាយព័ត៌មាន»

អង្គភាពអ្នកនាំពាក្យរាជរដ្ឋាភិបាល បានបើកកិច្ចប្រជុំពិភាក្សា និងផ្សព្វផ្សាយស្តីពី “យុទ្ធសាស្ត្រនយោបាយព័ត៌មាន” ដើម្បីបំផុសផ្សព្វផ្សាយនូវទស្សនទាន និងសមិទ្ធផល ក្នុងអាណត្តិទី៦ របស់រាជរដ្ឋាភិបាល ដែលបានអនុវត្តនៅថ្នាក់​ក្រោមជាតិ នៅព្រឹកថ្ងៃទី១២ ខែមករា ឆ្នាំ២០២៣ នាទីស្តីការក្រសួងមហាផ្ទៃ ក្រោមវត្តមានអញ្ជើញជាអធិបតី លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធាន​អង្គភាពអ្នកនាំពាក្ររាជរដ្ឋាភិបាល។

កិច្ចប្រជុំនេះ ធ្វើឡើងក្នុងគោលបំណង ផ្តោតលើយុទ្ធនាការពន្យល់ផ្សព្វផ្សាយ ដល់សាធារណជនអំពីសមិទ្ធផល​ការងារ​របស់​មន្ទីរជំនាញនានាជុំវិញ រាជធានី-ខេត្ត រួមគ្នាធ្វើយុទ្ធនាការផ្សព្វផ្សាយស្តីពី “ភាពជោគជ័យរយៈពេល ៥ឆ្នាំកន្លងមក របស់រដ្ឋបាលរាជធានី-ខេត្ត ដើម្បីរៀបចំវេទិកាសាធារណៈ ក៏ដូចជាវេទិកាឆ្លើយឆ្លងតាមរលកធាតុ អាកាស ទៅដល់មូល​ដ្ឋានផ្ទាល់របស់ប្រជាពលរដ្ឋ នៅក្នុងដែនដីនៃរដ្ឋបាលរាជធានី-ខេត្ត របស់ខ្លួន ។

លោក ផៃ ស៊ីផាន បានលើកឡើងថា បំណងស្នូលនៃកិច្ចប្រជុំនេះ គឺពង្រឹងយន្តការ និងគោល នយោបាយព័ត៌មាន​ថ្នាក់ក្រោមជាតិ ដើម្បីធ្វើយុទ្ធនាការ រួមគ្នាប្រមូលផ្ដុំផ្សព្វផ្សាយ បំផុសឱ្យប្រជាពលរដ្ឋ យល់ដឹងកាន់តែច្បាស់ នូវ​សមិទ្ធផល ដែលជាការប្រឹងប្រែងរបស់រដ្ឋបាលរាជធានី-ខេត្ត និងជំរុញការផ្តល់សេវាសាធារណៈ​ឱ្យទៅគៀក​ផ្ទាល់​ជូនប្រជាពលរដ្ឋនៅមូលដ្ឋាន ប្រកបដោយប្រសិទ្ធភាព និងស័ក្តិសិទ្ធភាពផងដែរ។

ជាមួយគ្នានេះ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានវាយតំលៃខ្ពស់ចំពោះ ក្រសួងស្ថាប័នមន្ទីរជំនាញ ដែលបានប្រឹងប្រែងបំពេញកិច្ចការងារបានយ៉ាងល្អ ពិសេសពាក់ពន្ធ័កិច្ចការងារព័ត៌មាន ។ ដូចច្នេះ ដើម្បីឱ្យ​កិច្ចការងារព័ត៌មាន និងផ្សព្វផ្សាយ បានកាន់តែទូលំទូលាយ គឺត្រូវរួមសហការ សាមគ្គីគ្នា ជួយផ្សាយបន្តពី​គ្នាទៅវិញទៅមក ទើបរាល់ព័ត៌មាន និងដំណឹងទាំងនោះបានជ្រួតជ្រាបដល់សាធាសារណជនទូទៅបាន​ដឹងរហ័ស​ទាន់ពេល ។

លោករដ្ឋមន្រ្តី ក៏បានសំណូម​ពរ​ដល់គ្រប់ស្ថាប័នអង្គភាពបញ្ជាការដ្ឋាន ស្នងការ យោធភូមិភាគ និងស្ថាប័នដ៏ទៃទៀត គួរតែបង្កើត​ឱ្យមានមន្រ្តីព័ត៌មាន ឬអ្នកនាំពាក្យរបស់ខ្លួន ដើម្បីអាចឆ្លើយតបជាមួយអ្នកសារព័ត៌មាន និងចម្ងល់របស់ប្រជាពលរដ្ឋ នៅពេលមានបញ្ហា​ពាក់ព័ន្ធជាមួយអង្គភាព ដោយមិនចាំបាច់ ប្រធានស្ថាប័ន អង្គភាពនោះ ឆ្លើយតបដោយផ្ទាល់នោះទេ ។ ភក្តី