សេដ្ឋកិច្ច

ចិនឈរលេខ១លើពាណិជ្ជកម្មទ្វេភាគីជាមួយកម្ពុជា កើនដល់ ១១ពាន់លានដុល្លារ

បានផុស

២ years មុន

នៅ

ថ្ងៃសុក្រ ១៣ មករា ២០២៣

ដោយ

ប្រទេសចិន នៅតែរក្សាបានកំណើនពាណិជ្ជកម្មទ្វេភាគីខ្ពស់ជាងគេជាមួយកម្ពុជា ដោយសម្រេចបាន ១១,៦៨៦ ពាន់លានដុល្លារ ក្នុងឆ្នាំ ២០២២ កើនឡើងជាង ៤ភាគរយ បើធៀបឆ្នាំ ២០២១ ដោយចំនួនទឹកប្រាក់ដែលចិននាំទំនិញមកកម្ពុជាបានគ្របដណ្តប់ដល់ជិត ៩០ ភាគរយនៃទំហំពាណិជ្ជកម្មសរុប។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយកដ្ឋានគយ និងរដ្ឋាករកម្ពុជាបង្ហាញថា ទំហំទឹកប្រាក់ធ្វើពាណិជ្ជកម្មរវាងប្រទេសទាំង ២ គឺស្មើនឹង ២២,២៩ ភាគរយនៃទំហំពាណិជ្ជកម្មសរុបរបស់កម្ពុជាក្នុងឆ្នាំ ២០២២ ដែលមានចំនួនជាង ៥២ ៤២៤ លានដុល្លារ។

បើតាមអគ្គនាយកដ្ឋានគយ ការនាំទំនិញពីប្រទេសចិនមកកម្ពុជា មានទឹកប្រាក់ជាង ១០,៤៤៥ ពាន់លានដុល្លារ កើន ៧,៩ ភាគរយ ពីចំនួន ៩,៦៨៤ ពាន់លានដុល្លារ ដែលឈរលេខ ១ ក្នុងនាមជាប្រទេសនាំទំនិញមកកម្ពុជាច្រើនជាងគេ ស្មើនឹងចំណែកទីផ្សារ ៣៤,៩ ភាគរយ។ ចំណែកទំនិញដែលកម្ពុជានាំទៅប្រទេសចិន មាន ១ ២៤០,៦៣ លានដុល្លារ ធ្លាក់ចុះ ១៧,៩ ភាគរយពីចំនួន ១,៥១០ ពាន់លានដុល្លារ និងស្មើ ៥,៥ ភាគរយនៃទីផ្សារនាំចេញសរុបរបស់កម្ពុជា។ ជញ្ជីងពាណិជ្ជកម្មកម្ពុជា ជាមួយប្រទេសចិន ក្នុងឆ្នាំ ២០២២ គឺកម្ពុជាមានឱនភាពប្រមាណ ៩ ២០៤,៩០៣ លានដុល្លារ។

ការរក្សាបាននូវកំណើនទំហំពាណិជ្ជកម្មទ្វេភាគីនេះ អាចនិយាយបានថា មកពីកត្តាសំខាន់ដូចជា ទំនាក់ទំនងដ៏ល្អប្រសើររវាងរដ្ឋាភិបាលប្រទេសទាំង ២, ការចូលជាធរមានព្រមគ្នានៃកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន (CCFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)នាដើមឆ្នាំ ២០២២៕