កីឡា

ការចាប់ផ្ដើមអាជីពជាគ្រូរបស់ Lampard មិនទាន់បានល្អ ខណៈត្រូវក្លិបបណ្ដេញចេញ ២ ដង

បានផុស

២ years មុន

នៅ

ថ្ងៃអង្គារ ២៤ មករា ២០២៣

ដោយ

អ៊ិន ពិសី

ក្លិប Everton បានបណ្ដេញអ្នកចាត់ការ លោក Frank Lampard ចេញពីតំណែង បន្ទាប់ពីដឹកនាំបានតិចជាង ១ ឆ្នាំ នៅ Goodison Park។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបរាជ័យក្រោមថ្វីដៃក្រុម West Ham United កាលពីថ្ងៃសៅរ៍ គឺជាការចាញ់លើកទី ៩ របស់ Everton ក្នុង ១២ ប្រកួត នៅក្របខណ្ឌ Premier League។ ពួកគេឈរនៅលេខរៀងទី ២ រាប់ពីបាតតារាងមកវិញ ដោយមាន ១៥ ពិន្ទុ ពីការប្រកួតចំនួន ២០ លើក នៅពីលើក្រុម Southampton ដោយខុសគ្នាលើចំនួនគ្រាប់បាល់។

អតីតខ្សែបម្រើជម្រើសជាតិអង់គ្លេស Lampard វ័យ ៤៤ ឆ្នាំ បានជំនួសតំណែង Rafael Benitez ក្នុងខែមករា ឆ្នាំ ២០២២ ជាមួយនឹងក្រុមឈរនៅលេខ ១៦ ក្នុងតារាង ហើយបានជួយ Everton ជៀសផុតពីការកាត់ចោល។

ការបណ្ដេញចេញបែបនេះ ហាក់បានសេចក្ដីថា លោក Frank Lampard នៅមិនទាន់ជោគជ័យក្នុងអាជីពជាគ្រូនៅឡើយទេ ក្នុងក្របខណ្ឌលីគកំពូលអង់គ្លេស ដ្បិតលោកធ្លាប់ត្រូវបានបណ្ដេញចេញម្ដងហើយ កាលពីដឹកនាំ Chelsea អំឡុងឆ្នាំ ២០១៩-២០២១។ នៅឆ្នាំ ២០២២ លោកបានចូលមកដឹកនាំ Everton ទៀត ប៉ុន្តែខ្វះ ៧ ថ្ងៃទៀតគ្រប់ ១ ឆ្នាំ លោកក៏ត្រូវបានបណ្ដេញចេញដោយក្លិប Everton ផងដែរ។

Lampard បានឈ្នះតែ ១២ ប្រកួត ក្នុងចំណោម ៤៤ ប្រកួតរបស់លោក នៅក្នុងការប្រកួតទាំងអស់ ដែលជាភាគរយឈ្នះ ២៧.២៧ ដែលអាក្រក់ជាងកំណត់ត្រារបស់លោក នៅ Derby (៤២.១%) និង Chelsea (៥២.៤%)៕

ប្រភព ៖ bbc.com

អត្ថបទ ៖ មន្នីរ័ត្ន