សមាគមអ្នកនាំចូលកូរ៉េជំរុញសមាជិកខ្លួនបង្កើនការធ្វើពាណិជ្ជកម្ម និងវិនិយោគនៅកម្ពុជា

លោក Byung-Kwan Kim ប្រធានសមាគមអ្នកនាំចូលកូរ៉េ បានលើកឡើងថា កិច្ចព្រមព្រៀងពាណិជ្ជកម្មសេរី​រវាងកម្ពុជា-កូរ៉េ នឹងលើកកម្ពស់វិស័យពាណិជ្ជកម្ម សេដ្ឋកិច្ច និងវិនិយោគ រវាងប្រទេសទាំងពីរ ឱ្យកាន់តែរីកចម្រើន​ថែមទៀត។ ទន្ទឹមនឹងនេះ លោកជំរុញដល់សមាជិកសមាគមអ្នកនាំចូលកូរ៉េ ឱ្យពិនិត្យលទ្ធភាពនាំចូលទំនិញកម្ពុជា មកទីផ្សារកូរ៉េ និងស្វែងរកដៃគូនៅកម្ពុជាបន្ថែមទៀត ជាពិសេសទាញយកប្រយោជន៍កិច្ចព្រមព្រៀងពាណិជ្ជកម្មសេរី​ទ្វេភាគីកម្ពុជា-កូរ៉េ។

ប្រធានសមាគមអ្នកនាំចូលកូរ៉េ លើកឡើងបែបនេះ នៅក្នុងជំនួបពិភាក្សាការងារជាមួយរដ្ឋមន្រ្តីក្រសួងពាណិជ្ជកម្មកម្ពុជា លោក ប៉ាន សូរស័ក្តិ កាលពីរសៀលថ្ងៃទី ២៦ មករា នៅទីក្រុងសេអ៊ូល, ប្រទេសកូរ៉េ។

នាជំនួបនេះ លោក ប៉ាន សូរស័ក្តិ បានលើកទឹកចិត្តសមាជិកសមាគមអ្នកនាំចូលកូរ៉េ ឱ្យទាញយកប្រយោជន៍​ពីកិច្ចព្រមព្រៀង​ពាណិជ្ជកម្ម​សេរី​ដែលកម្ពុជា និងកូរ៉េជាសមាជិក ដែលរួមមានជាអាទិ៍ កិច្ចព្រមព្រៀងពាណិជ្ជកម្មសេរី​អាស៊ាន-កូរ៉េ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ និងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដែលទើប​នឹងចូល​ជាធរមានកាលពីថ្ងៃទី១ ខែធ្នូ ឆ្នាំ២០២២ កន្លងទៅ ក៏ដូចជាការលើកទឹកចិត្តនានានៅក្រោម​ច្បាប់ស្តីពីវិនិ​យោគថ្មី។

លោកបានគូសបញ្ជាក់ថា កិច្ចព្រមព្រៀងពាណិជ្ជកម្មទាំងនោះ បានផ្តល់ទីផ្សារអនុគ្រោះ និងលក្ខខណ្ឌអំណោយផល សម្រាប់ផលិតករ អ្នកនាំចេញ នាំចូល ទាំងកម្ពុជា និងកូរ៉េ ក្នុងការជំរុញការធ្វើពាណិជ្ជកម្ម និងវិនិយោគ ទៅវិញទៅមក។ កិច្ចព្រមព្រៀងទាំងនោះក៏នឹងដើរតួនាទីសំខាន់ក្នុងការជំរុញ កិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគ រវាងប្រទេសទាំងពីរ ផងដែរ។

សូមបញ្ជាក់ថា នៅក្នុងកិច្ចប្រជុំនេះ វិស័យឯកជនពាក់ព័ន្ធនៃប្រទេសទាំងពីរ បានណែនាំពីកម្មវត្ថុអាជីវកម្មរបស់ខ្លួន និងចែករំលែកទៅវិញទៅមក នូវព័ត៌មានពាណិជ្ជកម្ម ប្រតិបត្តិការអាជីវកម្ម និងវិស័យ/ទំនិញសក្កានុពល ដែលជា​ចំណាប់អារម្មណ៍ ដើម្បីសហការធ្វើពាណិជ្ជកម្មរវាងកម្ពុជា និងកូរ៉េ ក៏ដូចជាការវិនិយោគក្នុងពេលខាងមុខ៕