រថយន្តព្រូសមួយគ្រឿងឆេះសល់តែគ្រោងឆ្អឹង សង្ស័យឆ្លងចរន្តអគ្គិសនី

រថយន្ត តូយ៉ូតា ព្រូស មួយគ្រឿង ត្រូវបានអគ្គិភ័យឆាបឆេះយ៉ាងសន្ធោសន្ធៅសល់តែគ្រោងឆ្អឹង បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកធ្វើអន្តរាគមន៍កាលពីវេលាម៉ោង៣ និង៤០នាទីរំលងអធ្រាត្រឈានចូលថ្ងៃទី២៩  ខែមករា ឆ្នាំ២០២៣ ស្ថិតនៅតាមបណ្ដោយផ្លូវបេតុង ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។

ប្រភពព័ត៌មានពីកន្លែងកើតហេតុបានឱ្យដឹងថា នៅពេលកើតហេតុ រថយន្តម៉ាកតូយ៉ូតា ព្រូស ពណ៌ស ពាក់ស្លាកលេខ  ភ្នំពេញ  2AL-8652 បានឈប់ចតនៅកណ្ដាលផ្លូវត្រង់ចំណុចកើតហេតុ ខាងលើ។ ក្រោយមកស្រាប់តែមានការឆាបឆេះចេញជាអណ្ដាតភ្លើងយ៉ាងសន្ធោសន្ធៅ បើទោះបីប្រជាពលរដ្ឋនាំគ្នាយកទឹកជះ ឬបាញ់ពន្លត់យ៉ាងណាក៏មិនរលត់នោះដែរ  រហូតទាល់តែក្រុមភ្ងាក់ងារបង្ការ សង្គ្រោះអគ្គិភ័យបានចេញរថយន្តមួយគ្រឿងមកបាញ់ទឹកពន្លត់ ទើបរលត់ទៅវិញជាស្ថាពរ ក៏ប៉ុន្តែ រថយន្តខាងលើត្រូវបានអគ្គិភ័យឆាបឆេះខ្ទេចសល់តែគ្រោងឆ្អឹងទៅហើយ ។

ជាជំហានបឋម ក្នុងករណីអគ្គិភ័យនេះ  សមត្ថកិច្ចសង្ស័យថា បណ្ដាលមកពីឆ្លងចរន្តអគ្គិសនី  ដោយមិនបង្កគ្រោះថ្នាក់ដល់មនុស្សនោះទេ៕

ដោយ ៖  សុខា