តម្លៃស្រូវសែនក្រអូបសើមឡើងពី ៩០០រៀល ដល់ជាង ១២០០រៀល/គីឡូក្រាម

មកដល់ចុងខែមករា ឆ្នាំ២០២៣ នេះ ស្រូវសែនក្រអូបសើមឡើងថ្លៃដល់ជាង ១២០០រៀល/គីឡូក្រាម បើធៀបនឹងតម្លៃ កាលពីដើមខែវិច្ចកា ឆ្នាំ២០២២ ដែលមានតម្លៃតែ ៩០០រៀលប៉ុណ្ណោះ ក្នុង ១គីឡូក្រាម ។ នេះបើតាមការឱ្យដឹងពីសហព័ន្ធស្រូវអង្ករកម្ពុជា។

លោក សុង សារ៉ន នាយកប្រតិបត្តិ នៃក្រុមហ៊ុន Amru Rice Cambodia បានឱ្យដឹងថា តំលៃធាតុជី ប្រេង ថ្នាំ រួមទាំងការដឹកជញ្ជូន ក៏មានភាពល្អប្រសើរផងដែរ ដែលអាចវាយតម្លៃបានថា វាស្ទើរតែដូចមុនពេលមានវិបិត្តកូវីដ១៩ ។

នៅពេលតម្លៃស្រូវបានឡើងខ្ពស់ជាងមុនបែបនេះ នាយកប្រតិបត្តិ ក្រុមហ៊ុន Amru Rice Cambodia រូបនេះក៏បានសម្តែងនូវក្តីរីករាយជាមួយកសិករដែរ ជាពិសេសលោកបានអរគុណដល់រោងម៉ាស៊ីនស្រូវ ធនាគារអភិវឌ្ឍន៍ជនបទ ក្រសួង រួមទាំងអង្គការពាក់ព័ន្ធដែលជួយដល់កសិករលើតម្លៃស្រូវនាពេលកន្លងមក។

លោកថា “សូមអរគុណដល់សមាជិករោងម៉ាសុីនកិនស្រូវ ធនាគារអភិវឌ្សន៍ជនបទ និងកសិកម្ម ក្រសួងសេដ្ឋកិច្ច និងហិរញវត្ថុ ក្រសួងពាណិជកម្ម ក្រសួងកសិកម្ម និងអង្កការដៃគូអភិវឌ្ឍន៍ ដែលបានសហការជួយគាំទ្រទាំង បច្ចេកទេស ពូជ ថវិកាកម្ចី ដើម្បីជួយពូមីង បងប្អូនកសិករ ពីទីវាលស្រែ ដល់ទីផ្សារ” ។

បើតាមទិន្នន័យបង្ហាញថា ស្រូវសែនក្រអូបសើម នៅពេលនេះ មានតម្លៃចន្លោះពី ១២២០រៀល-១២៤០រៀល ក្នុង ១គីឡូក្រាម ដែលចំនួននេះ ជាតម្លៃទិញនៅវាលស្រែ (ពោលគឺតម្លៃទិញពី វាលស្រែផ្ទាល់ ពុំមែននៅលើទីផ្សារឡើយ)។
ចំណែកស្រូវសសើមឡើងថ្លៃ ពី ៨៥០ រៀល / ១ គីឡូរក្រាម កើនដល់១០៤០ រៀល / ១ គីឡីរក្រាម៕