យកផាវគ្រាប់បែកច្នៃបោកត្រី ភ្លាត់​ស្នៀតផ្ទុះដាច់ប្រអប់ដៃម្ខាង

បុរសម្នាក់បានរងរបួសជាទម្ងន់ រហូតដល់ដាច់ប្រអប់ដៃម្ខាង ខណ:យកផាវគ្រាប់បែក មកច្នៃធ្វើជាគ្រាប់សម្រាប់បោកត្រីតែត្រូវភ្លាត់ស្នៀតបណ្តាលអោយគ្រាប់នោះផ្ទុះឡើងតែម្តង។

ហេតុការណ៍ដែលបង្កអោយមានការភ្ញាក់ផ្អើល ដោយសារតែមានសម្លេងផ្ទុះឡើងយ៉ាងខ្លាំងនេះ គឺបានកើតឡើង កាលពីថ្ងៃទី​ ១១ ខែកុម្ភ: ឆ្នាំ២០២៣ វេលាម៉ោង ១ រសៀល នៅចំណុច ក្នុងស្ទឹងចម្លងគួយ ស្ថិតក្នុងភូមិចម្លងរមាំងលើ ឃុំអូរសំរិល ស្រុកសំឡូត។

ជនរងគ្រោះមានឈ្មោះ ប្រេង ព្រិច ភេទប្រុស អាយុ ៣៦ ឆ្នាំ រស់នៅភូមិ ឃុំ កើតហេតុខាងលើ ដោយនៅមុនពេលកើតហេតុ ជនរងគ្រោះបានយកផាវគ្រាប់បែកទៅដំយករំសេវ ដើម្បីកែឆ្នៃបោកត្រីក្នុងស្ទឹង។

បើតាមការអោយដឹងពីសមត្ថកិច្ចមូលដ្ឋានបានបញ្ជាក់ថា នៅពេលកំពុច្នៃនោះ ស្រាប់តែផាវគ្រាប់បែកបានផ្ទុះឡើងយ៉ាងខ្លាំង បណ្តាលអោយរងរបួសដាច់ប្រអប់ខាងស្តាំម្ខាង ដោយភ្លាមៗនោះ ក្រុមគ្រួសារបានដឹកយកទៅមន្ទីរពេទ្យបង្អែកខេត្តបាត់ដំបង ដើម្បីសង្គ្រោះ ។ នៅពេលនោះដែរសមត្ថកិច្ចក៏បានផ្សព្វផ្សាយដល់ពលរដ្ឋ សូមមេត្តាកុំយករំសេវទៅកែច្នៃបែបនេះ ព្រោះអាចជួបគ្រោះថ្នាក់បែបនេះ ពិសេសបើប្រទះឃើញយុទ្ធភ័ណមិនទាន់ផ្ទុះត្រូវរាយការណ៍ជាបន្ទាន់ដល់សមត្ថកិច្ច៕

អត្ថបទ : សោ និយមរ័ត្ន