ប្រជាជននូវែលសេឡង់ជិត ២លាននាក់ កំពុងត្រៀមទប់ទល់ព្យុះដ៏ខ្លាំងក្លា នៅយប់នេះ

ប្រជាជនទីក្រុង Auckland ប្រមាណជិត ២លាននាក់នៃប្រទេសនូវែលសេឡង់ កំពុងត្រៀមខ្លួនទប់ទល់ឥទ្ធិពលខ្យល់ព្យុះដែលនឹងវាយប្រហារស្រុកភូមិរបស់ពួកគេ នៅយប់ថ្ងៃទី១២ ខែកុម្ភៈ ឆ្នាំ២០២៣នេះ។

ព្យុះស៊ីក្លូន Gabrielle ប្រភេទទី២ បានបោកបក់ទៅលើកោះ Norfolk កាលពីយប់ថ្ងៃសៅរ៍ ជាមួយនឹងការបំផ្លិចបំផ្លាញយ៉ាងខ្លាំង ហើយវានឹងបន្តវាយប្រហារខ្លាំងក្លាដល់ប្រទេសនូវែលសេឡង់ នៅយប់ថ្ងៃអាទិត្យនេះ។

លោក Georgina Griffith អ្នកនាំពាក្យរបស់ MetService ដែលជាអ្នកព្យាករណ៍អាកាសធាតុរបស់ប្រទេស បាននិយាយថា ទីក្រុងដែលមានប្រជាជនចំនួន ១.៦លាននាក់ នឹងស្ថិតក្រោមស្ថានភាពអាកាសធាតុអាក្រក់បំផុត ដែលទីក្រុងទាំងមូលនឹងមានធ្លាក់ភ្លៀងយ៉ាងពេញទំហឹង បូករួមនឹងព្យុះខ្លាំងៗផងដែរ។

យ៉ាងណាក្ដី ពេលនេះព្យុះ និងភ្លៀងបាន និងកំពុងសាយភាយបណ្ដើរៗពីភាគខាងជើងរបស់ប្រទេស ជាមួយនឹងខ្យល់បោកបក់ក្នុងល្បឿន ១៤០គីឡូម៉ែត្រក្នុងមួយម៉ោង នៅរសៀលថ្ងៃអាទិត្យ ហើយវានឹងបន្តក្នុងរយៈពេល ៣ថ្ងៃឯណោះ ដែលអាចនឹងបញ្ចប់នៅថ្ងៃអង្គារ។ ចំណែកក្រុមហ៊ុនអាកាសចរណ៍នានាកំពុងប្រកាសការលុបចោលជើងហោះហើរ។

ទីភ្នាក់ងារគ្រប់គ្រងគ្រោះអាសន្ននៃទីក្រុង Auckland និយាយថា ខ្លួនកំពុងធ្វើការយ៉ាងមមាញឹកដើម្បីរៀបចំជម្រកសង្គ្រោះបន្ទាន់ចំនួន ២៦កន្លែង សម្រាប់ការមកដល់នៃព្យុះក្នុងរយៈពេលប៉ុន្មានថ្ងៃខាងមុខនេះ៕

ប្រែសម្រួល៖ សន្យា

ប្រភព៖ CNA

ចុចអាន៖ ប្រជាជនគុយវ៉ែត រៃអង្គាសប្រាក់ ៦៧លានដុល្លារ ជួយជនរងគ្រោះនៅ តួកគី