ផ្លាកលេខឡានអក្សរ “R” ដេញថ្លៃនៅ ហុងកុង ក្នុងតម្លៃជាង ៣ លានដុល្លារ

ស្លាកលេខរថយន្តផ្ទាល់ខ្លួនអក្សរ “R” លក់ចេញក្នុងតម្លៃជាង ២៥ លានដុល្លារហុងកុង (៣,១៨ លានដុល្លារ) នៅឯការដេញថ្លៃរបស់រដ្ឋាភិបាលដែលជាតម្លៃខ្ពស់បំផុតទីពីរនៅក្នុងទីក្រុងហុងកុង ។ 

ផ្លាកលេខនេះគឺជា ផ្លាកលេខមួយក្នុងចំណោម ៤៩ ដែលត្រូវដាក់នៅឯការដេញថ្លៃប្រចាំឆ្នាំរៀបចំដោយនាយកដ្ឋានដឹកជញ្ជូនកាលពីថ្ងៃអាទិត្យ ទី ១២ ខែកុម្ភៈ ឆ្នាំ ២០២៣ ។

ការដេញថ្លៃផ្លាកលេខ “R” បានចាប់ផ្តើមនៅតម្លៃ ៥ ពាន់ដុល្លារហុងកុង បន្ទាប់ពីប្រហែល ៦០ ជុំ ញញួរបានទម្លាក់ចុះក្នុងតម្លៃ ២៥,៥ លានដុល្លារហុងកុង ។ ចំណែកផ្លាកលេខថ្លៃបំផុតក្នុងទីក្រុងហុងកុងគឺអក្សរ “W” លក់ក្នុងតម្លៃ ២៦ លានដុល្លារហុងកុងក្នុងខែមីនា ឆ្នាំ ២០២១ ប្រហែលថ្លៃជាងតម្លៃដើមដល់ទៅ ៥,២០០ ដងឯណោះ ។

ទន្ទឹមនេះអ្នកឈ្នះក្នុងការដេញថ្លៃមិនបានឆ្លើយតបទៅនឹងការសាកសួរប្រព័ន្ធផ្សព្វផ្សាយណាទាំងអស់នៅពេលដែលនាងចាកចេញពីសាលដេញថ្លៃនៅឯមជ្ឈមណ្ឌលសន្និបាតនិងពិព័រណ៍ Wan Chai ។ ក្នុងថ្ងៃតែមួយស្លាកលេខ “292” លក់ក្នុងតម្លៃ ៨៥០,០០០ ដុល្លារហុងកុង ដែលជាការដេញថ្លៃខ្ពស់បំផុតទីពីរបន្ទាប់ពីអក្សរ “R” ។

បើតាមលេខាធិការផ្នែកដឹកជញ្ជូននិងភស្តុភារលោក Lam Sai-hung បាននិយាយនៅលើប្លុករបស់គាត់កាលពីថ្ងៃសៅរ៍ថា ការលក់ស្លាកសញ្ញាចុះបញ្ជីយានយន្តផ្ទាល់ខ្លួនបានរកប្រាក់បានជិត ៦០០ លានដុល្លារហុងកុងសម្រាប់រដ្ឋាភិបាលចាប់តាំងពីឆ្នាំ ២០០៦ មកម្ល៉េះ ៕

ប្រែសម្រួល ៖ វារី

ប្រភព ៖ Bangkokpost

ចុចអាន ៖ តារាល្បីម្នាក់ចំណាយប្រាក់ជិត ២០ម៉ឺនដុល្លារ ដេញថ្លៃបន្តោងខ្សែកព្រះនាង Diana