ព័ត៌មានជាតិ

កុមារនៅខេត្តព្រៃវែងស្លាប់ដោយសារជំងឺផ្ដាសាយបក្សី H5N1 សង្ស័យឆ្លងមកពីសត្វព្រៃ

បានផុស

២ years មុន

នៅ

ថ្ងៃព្រហស្បតិ៍ ២៣ កុម្ភៈ ២០២៣

ដោយ

លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធ និងជំងឺឆ្លងបានមានប្រសាសន៍កាលពីយប់ថ្ងៃទី ២២ ខែកុម្ភៈថា ករណីកុមារីអាយុ ១១ ឆ្នាំ រស់នៅភូមិរលាំង ឃុំរំលេច ស្រុកស៊ីធរកណ្តាល ខេត្តព្រៃវែងដែលបានស្លាប់បាត់បង់ជីវិតដោយសារជំងឺផ្ដាសាយបក្សី H5N1 សង្ស័យឆ្លងមកពីសត្វព្រៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិតបានបន្តថា «យើងនឹងអង្កេតជាបន្តទៀតថាតើកុមារីឆ្លងជំងឺនឹងឆ្លងប្រភពមកពីណាហើយនរណាទៀតឈឺត្រូវយកឈាម និងសំណាកទៅមើលជាបន្តទៀត និងរង់ចាំលទ្ធផលពីពេទ្យសត្វទាំងពេទ្យសត្វស្រុក និងសត្វព្រៃទៀតតែសំខាន់ឃើញថាសត្វព្រៃងាប់ខុសពីធម្មតា។ អីចឹងយើងសង្ស័យគាត់អាចប៉ះពាល់សត្វព្រៃទើបធ្វើឱ្យគាត់ឆ្លងបាន»។

បើតាមនាយកដ្ឋានប្រយុទ្ធ និងជំងឺឆ្លងបានឲ្យដឹងថា កុមារីស្លាប់ដោយសារជំងឺផ្ដាសាយបក្សី H5N1 បានចាប់ផ្តើមឈឺនៅថ្ងៃទី ១៦ ខែកុម្ភៈ ឆ្នាំ២០២៣ ដោយមានរោគសញ្ញាគ្រុនក្តៅ ៣៩ អង្សា ព្រមទាំងមានក្អក និងឈឺក។

ក្រោយព្យាបាលនៅមូលដ្ឋានមិនធូរស្រាលដោយកុមារីចាប់ផ្តើមហត់ក៏បញ្ជូនព្យាបាលនៅមន្ទីរពេទ្យកុមារជាតិនៅភ្នំពេញ។

នៅថ្ងៃទី ២១ ខែកុម្ភៈ ឆ្នាំ២០២៣ គ្រូពេទ្យព្យាបាលបានយកវត្ថុសំណាកផ្ញើមកវិទ្យាស្ថានជាតិសុខភាពសាធារណៈ រួចទទួលលទ្ធផល ថ្ងៃទី ២២ ខែកុម្ភ: ឆ្នាំ២០២៣ បញ្ជាក់មានវិជ្ជមាន មេរោគផ្តាសាយបក្សី H5N1។

នាយកដ្ឋានប្រយុទ្ធ និងជំងឺឆ្លងបានសំណូមពរដល់បងប្អូនប្រជាពលរដ្ឋកុំប៉ះពាល់សត្វឈឺ ឬងាប់ទាំងសត្វបក្សីស្រុកនិងបក្សីព្រៃ ប្រសិនបើមានករណីសង្ស័យសូមពិគ្រោះជំងឺជាមួយគ្រូពេទ្យ ឬរាយការណ៍ទៅលេខ ១១៥៕

អត្ថបទ៖ សំអឿន

Related Topics:ផ្ដាសាយបក្សី