តារាចម្រៀងលោក ណូយ វណ្ណា បើករថយន្តបុករបាំងថ្មគល់ស្ពានអាកាសក្បាលថ្នល់

តារាចម្រៀងជើងចាស់លោក ណូយ វណ្ណា ដែលជាប្អូនប្រុសបង្កើតលោក ណូយ វ៉ាន់ណេត បានជួបគ្រោះថ្នាក់ចរាចរណ៍​ដោយបើករថយន្តបុករបាំងថ្មគល់ស្ពានអាកាសក្បាលថ្នល់បណ្តាលឲ្យរងការខូចខាតខ្ទេចមួយកំណាត់មុខ។

ប្រភពព័ត៌មានបានឲ្យដឹងថា តារាចម្រៀងលោក ណូយ វណ្ណា បានបើករថយន្តម៉ាកLexusRX330 មួយគ្រឿងក្នុងល្បឿនលឿនគួរសមហើយស្រាប់តែមកដល់ចំណុចកើតហេតុក៏បានជ្រុលចង្កូតទៅបុកជាមួយរបាំងថ្មគល់ស្ពានអាកាសក្បាលថ្នល់រងការខូចខាតរថយន្តផ្នែកខាងមុខជាដំណំ។ ចំណែកលោក ណូយ វណ្ណា សំណាងល្អគ្រាន់តែរងរបួសស្រាល។

ហេតុការណ៍គ្រោះថ្នាក់នេះកើតឡើងកាលពីវេលាម៉ោង១២និង៣០នាទីរំលងអាធ្រាត្រឈានចូលថ្ងៃទី០២ ខែមីនាឆ្នាំ២០២៣ ស្ថិតនៅត្រង់ចំណុចមុខអគ្គស្នងការនគរបាលជាតិ តាមមហាវិថីព្រះនរោត្តមក្នុងសង្កាត់ទន្លេបាសាក់ ខណ្ឌចំការមន។

លោក ណូយ វណ្ណា បានបើករថយន្តម៉ាក Lexus RX330 ពណ៌ស្ករពាក់ស្លាកលេខភ្នំពេញ 2BF-7616បើកបក្នុងទិសដៅពីជើងមកត្បូងលុះមកដល់ចំណុចកើតហេតុក៏ស្រាប់តែជួបគ្រោះថ្នាក់នេះតែម្តង។ ក្រោយកើតហេតុភ្លាមៗនោះសមត្ថកិច្ចចុះមកវាស់វែង និងនាំយករថយន្តបង្ករបស់តារាចម្រៀងលោក ណូយ វណ្ណា ទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយបន្តនៅពេលក្រោយ។ ចំណែកលោក ណូយ វណ្ណា ត្រូវបានក្រុមគ្រួសារ និងកូនក្មួយដឹកយកទៅផ្ទះ៕

អត្ថបទ៖ ចាន់រ៉ា