មន្ត្រីស្ថានទូតជប៉ុន បង្ហាញនូវឆន្ទះគាំទ្រ បន្តរក្សាទំនាក់ទំនងជិតស្និតជាមួយអាជ្ញាធរជាតិព្រះវិហារ

លោក TANINAI Ichitomo អគ្គរាជទូតរង នៃស្ថានទូតជប៉ុនប្រចាំកម្ពុជា បង្ហាញនូវឆន្ទះគាំទ្រ និងបន្តរក្សាទំនាក់ទំនងយ៉ាងជិតស្និតជាមួយអាជ្ញាធរជាតិព្រះវិហារ។

ការបង្ហាញនេះ ធ្វើឡើងក្នុងដំណើរទស្សនកិច្ចរបស់ស្ថានទូតជប៉ុនប្រចាំកម្ពុជាមកកាន់រមណីយដ្ឋានប្រាសាទព្រះវិហារ និងប្រាសាទកោះកេរ នាពេលថ្មីៗកន្លងនេះ។ នេះ បើតាមការឱ្យដឹងពី អាជ្ញាធរជាតិព្រះវិហារ។

លោក TANINAI Ichitomo អគ្គរាជទូតរង នៃស្ថានទូតជប៉ុនប្រចាំកម្ពុជា ខណៈជា ប្រធានប្រតិភូ​ បានបង្ហាញនូវឆន្ទះគាំទ្រ និងបន្តរក្សាទំនាក់ទំនងយ៉ាងជិតស្និតជាមួយអាជ្ញាធរជាតិព្រះវិហារ ព្រមទាំងពិនិត្យលទ្ធភាពគិតគូរនូវថវិកាមូលនិធិដែលបានមកពីប្រទេសជប៉ុន ដើម្បីផ្តល់ឲ្យអាជ្ញាធរជាតិព្រះវិហារផ្ទាល់ ឬមធ្យោបាយផ្សេងៗ ក្នុងគោលដៅអភិរក្ស ជួសជុល សំណង់ប្រាសាទ និងកិច្ចការអភិវឌ្ឍន៍នានាឲ្យអស់ពីលទ្ធភាព សម្រាប់តំបន់រមណីយដ្ឋានបេតិកភណ្ឌប្រាសាទព្រះវិហារ និងប្រាសាទកោះកេរ។

ដំណើរទស្សនកិច្ចនេះ ក្នុងគោលបំណងសិក្សាស្វែងយល់អំពីវប្បធម៌​ ប្រវត្តិសាស្រ្ត និងសមិទ្ធិផលនានារបស់អាជ្ញាធរជាតិព្រះវិហារ លើកិច្ចការងារអភិរក្ស និងជួសជុល កិច្ចការអភិវឌ្ឍន៍សហគមន៍ និងព្រមទាំងបញ្ហាប្រឈមនាពេលបច្ចុប្បន្ននេះ។

អគ្គនាយរង​ និងថ្នាក់នាំមួយចំនួន នៃអាជ្ញាធរជាតិព្រះវិហារ បានទទួលស្វាគមន៍ លោក TANINAI Ichitomo អគ្គរាជទូតរងនៃស្ថានទូតជប៉ុនប្រចាំកម្ពុជា និងសហការីអញ្ជើញមកទស្សនកិច្ចរមណីយដ្ឋានប្រាសាទព្រះវិហារ និងប្រាសាទកោះកេរ ដោយយកចិត្តទុកដាក់៕