ឆ្នេរ​កែប​ប្រែមុខមាត់ថ្មី អាជ្ញាធរ​ចាប់ផ្អើមកែលម្អ​តាម​បណ្តោយ​ឆ្នេរ​ ទាក់ទាញ​អ្នក​ទេសចរ

នៅតាមបណ្តោយឆ្នេរលេងទឹកដល់រូបសំណាកស្រីសនៅ​ក្នុង​ខេត្តកែប ក្រុមកម្មករកំពុង​ដាំដើមឈើនិង​រៀបខឿនការ៉ូឡាថ្មី​ ដែល​នៅ​ពេល​ឆាប់ៗ​នេះ​នឹង​ប្រែក្លាយទៅជា​តំបន់មាត់ឆ្នេរ​ដ៏ស្រស់ស្អាត​ទាក់ទាញទេសចរបន្ថែមទៀត​។

ពាក់ព័ន្ធកែលម្អសោភ័ណភាពនៅបណ្តោយឆ្នេរខ្សាច់លេងទឹកកម្សាន្តរូបសំណាកស្រីសឡើងវិញនេះ លោក​ សោម ពិសិដ្ឋ អភិបាលខេត្តកែបបាន​បញ្ជាក់ថា​ក៏​ដើម្បី​លុបបំបាត់ភាពអវិជ្ជមានដែលបានកើតឡើងជាយូរណាស់មកហើយ។ ការ​រៀបចំ​មាន​ការ​កែលម្អសោភ័ណ្ឌភាពឆ្នេរខ្សាច់លេងទឹក និងដាំដើមឈើឲ្យមានសោភណភាព ដើម្បី​បម្រើ​ជាប្រយោជន៍​ទាំងអស់គ្នា។

ការ​រៀបចំ​កែ​លម្អ​តាមបណ្តោយ​ឆ្នេរនេះ​ បើតាមលោក​អភិបាល​ខេត្តកែបក៏​នឹងរំកិលរូបសំណាកស្រីសដោយ​ស្ថាបនា​ផ្លូវចូលទៅក្នុងសមុទ្របន្ថែមទៀត រួមទាំង​ការ​​ចាក់ដីពង្រីកកន្លែងរូបសំណាកឲ្យធំជាងមុន។

លោក​ សោម ពិសិដ្ឋ អភិបាល​ខេត្ត​កែបបអះអាង​ថា នៅ​ឆ្នាំ២០២៣ រដ្ឋបាល​ខេត្ត​ក៏​បន្ត​រៀបចំ​​សោភ័ណភាពនៅតាមបណ្តោយ​ផ្លូវសំខាន់​ៗ ក្នុង​នោះចាប់ពីចំណុចរូបសំណាកស្រីសដល់រូបសំណាកក្តាមសេះ និង​​បន្ត​រហូត​ដល់ពយព្រះរាជដំណាក់​។

នៅ​ឆ្នាំ ២០២៣ ខេត្តកែបនឹង​ធ្វើជាម្ចាស់ផ្ទះក្នុងការ​ទទួល​រៀបចំព្រឹត្តិការណ៍ធំៗចំនួនពីរ គឺកីឡាស៊ីហ្គេមផ្នែកវិញ្ញាសា​ទ្រីយ៉ាត្លុង និងពិធីបុណ្យសមុទ្រ។ បច្ចុប្បន្នអាជ្ញាធរ​ខេត្តកំពុងពន្លឿនការ​កែលម្អ​តាម​បណ្តោយ​មាត់ឆ្នេរ ដោយ​មានការ​ដាំដើមឈើថ្មី រៀបចំ​ក្រាល​ការរ៉ូឡា​​​ ដើម្បី​លើកកម្ពស់សោភណភាព​ត្រៀម​ទទួ​ល​ភ្ញៀវ​ទេសចរ​​ក៏​ដូចជា​​ប្រតិភូ​ដែលនឹង​ចូល​មកកម្សាន្ត និង​ទស្សនា​ការ​ប្រកួត​កីឡា​ស៊ីហ្គេម​នៅ​ពេល​ខាងមុខ៕

អត្ថបទ៖ សឹង រ៉ាត់