Update៖ អគ្គិភ័យដែលឆេះនៅខណ្ឌ​សែនសុខព្រឹកមិញ ជាឃ្លាំងស្តុកគ្រឿងបន្លាស់រថយន្ដ

ករណីអគ្គិភ័យដែលឆាបឆេះកាលពីម៉ោងជាង៨ព្រឹកមិញនេះ ទីតាំងឆេះគឺជាឃ្លាំងស្តុកគ្រឿងបន្លាស់រថយន្ដត្រូវបានអណ្ដាតភ្លើងឆាបឆេះអស់ទាំងស្រុង តែមិនបណ្ដាលឲ្យមានអ្នករងរបួស ឬបាត់បង់អាយុជិវិតនោះទេ។

ម្ចាស់ទីតាំងដែលត្រូវអគ្គិភ័យឆេះនេះមានឈ្មោះ គីម ហួត ភេទប្រុស អាយុ៤២ឆ្នាំ ជនជាតិខ្មែរ មុខរបរលក់គ្រឿងបន្លាស់​រថយន្ត។ ទីតាំងខាងលើ ជាប្រភេទសំណង់ថ្មបេតុង ប្រក់ស័ង្កសី មានទំហំ១៦ម៉ែត្រ គុណ ២០ម៉ែត្រ និងបាន​ឆាបឆេះរថយន្ត Camery បាឡែន មួយគ្រឿង រួមទាំងគ្រឿងបន្លាស់រថយន្ត និងប្រេងម៉ាស៊ីនអស់ទាំងស្រុង។

គួររំលឹកថា ករណីអគ្គិភ័យនេះបានកើតឡើងកាលពីវេលាម៉ោង០៨និង២០នាទី ព្រឹកថ្ងៃទី១៧ ខែមីនា ឆ្នាំ២០២៣ នៅតាមបណ្ដោយផ្លូវឧកញ៉ា ម៉ុង ឫទ្ធី ក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ប្រភពមួយចំនួនបានបញ្ជាក់ថា ករណីនេះគឺផ្ដើមដោយសារឆ្លងចរន្ដអគ្គិសនី៕

អត្ថបទ៖ សុខុម