ធនាគារពិភពលោក ពិនិត្យគម្រោងលើកកម្ពស់ការបន្ស៊ីប្រព័ន្ធឧត្ដមសិក្សាកម្ពុជា ជាមួយសេដ្ឋកិច្ច

ក្រុមបេសកកម្ម ធនាគារពិភពលោក ពិនិត្យគម្រោង លើកកម្ពស់ការបន្ស៊ីប្រព័ន្ធឧត្ដមសិក្សាកម្ពុជា ជាមួយសេដ្ឋកិច្ច (PEACHES) ដោយ បណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានអនុញ្ញាតទទួលជួបក្រុមការងារបេសកកម្មរបស់ធនាគារពិភពលោក។ ជំនួបនេះធ្វើឡើងនៅ ថ្ងៃទី២៧ ខែមីនា ឆ្នាំ២០២៣។

គោលបំណងនៃបេសកកម្ម និងកិច្ចជំនួបនេះគឺ៖

១. ពិភាក្សាអំពីគោលគំនិត និងវិសាលភាពនៃគម្រោងឧត្តមសិក្សាថ្មី

២. ឯកភាពលើទិដ្ឋភាពចម្បងៗ នៃការរៀបចំ និងអនុវត្តគម្រោង រួមបញ្ចូលទាំងសកម្មភាពអាទិភាពលទ្ធផលការរៀបចំអនុវត្ត កាតព្វកិច្ចផ្លូវច្បាប់ និងការវាយតម្លៃហានិភ័យ សុវត្ថិភាពសង្គមំ និងបរិស្ថាន

៣. ឯកភាពលើជំហានដែលត្រូវអនុវត្តដើម្បីពន្លឿនការរៀបចំគម្រោងក្រុម។ ការងារបេសកកម្មនេះ នឹងធ្វើការងារយ៉ាងជិតស្និទ្ធជាមួយមន្ត្រីពាក់ព័ន្ធរួមមាន៖ ក្រសួងអប់រំ យុវជន និងកីឡា ក្រសួងសេដ្ឋកិច្ចនិងហិរញ្ញវត្ថុ គ្រឹះស្ថានឧត្តមសិក្សាសាធារណៈទាំង៦ក្រោមគម្រោងកែលម្អការអប់រំឧត្តមសិក្សា និងដៃគូអភិវឌ្ឍន៍នានាដើម្បីពិភាក្សាអំពីវិសាលភាព និងការរៀបចំគម្រោងឧត្តមសិក្សាថ្មីដែលបានស្នើ។

បេសកកម្មនេះ ដឹកនាំដោយ លោក បេង ស៊ីមេត និងលោក Tsuyoshi Fukao អ្នកឯកទេសអប់រំជាន់ខ្ពស់នៃធនាគារពិភពលោក និងសមាសភាព ពាក់ព័ន្ធផ្សេងៗទៀត៕