កម្លាំងចម្រុះល្បាតក្បែរទល់ដែនកម្ពុជា-វៀតណាម បង្ការទប់ស្កាត់បទល្មើសគ្រឿងញៀន​ឆ្លងដែន

ខេត្តស្វាយរៀង៖ លោក តូច ប៉ូលីវ៉ា អភិបាលរងខេត្តស្វាយរៀង ប្រធានលេខាធិការដ្ឋានត្រួតពិនិត្យគ្រឿងញៀនខេត្ត និងជាប្រធានការិយាល័យBLO បាវិត តំណាងលោក ម៉ែន វិបុល អភិបាលខេត្ត នៅយប់ថ្ងៃទី២៨ ខែមីនា ឆ្នាំ២០២៣ បានបន្តដឹកនាំកម្លាំងចម្រុះចុះធ្វើលំហាត់អនុវត្តល្បាតចល័តត្រួតពិនិត្យតាមបណ្តោយផ្លូវជាតិលេខ១ ចម្ងាយ ១៤០០ម៉ែត្រ ពីច្រកទ្វារព្រំដែនអន្តរជាតិបាវិត គឺនៅខាងមុខផ្សារអន្តរជាតិ  ដើម្បីបង្ការទប់ស្កាត់បទល្មើសឆ្លង​ដែនពិសេសបទល្មើសគ្រឿងញៀនខុសច្បាប់។

លោកអភិបាលរងខេត្ត បានមានប្រសាសន៍ឲ្យដឹងថា គោលបំណងនៃការចុះធ្វើលំហាត់អនុវត្តល្បាតចល័តត្រួត​ពិនិត្យនៅតាមបណ្ដោយផ្លូវជាតិលេខ១នេះ គឺដើម្បីស្រាវជ្រាវស្វែងរកមុខសញ្ញាចែកចាយចរាចរណ៍​គ្រឿងញៀននៅតាមមាត់ច្រកទ្វារព្រំដែនអន្តរជាតិរវាងប្រទេសកម្ពុជានិងវៀតណាម។

សូមរម្លឹកផងដែរថា សម្រាប់ប្រទេសកម្ពុជា មាត់ច្រកទ្វារព្រំដែនអន្តរជាតិចំនួន ៤ ដែលត្រូវធ្វើលំហាត់ល្បាតនេះ គឺទី១ ច្រកទ្វារព្រំដែនអន្តរជាតិត្រពាំងផ្លុងខេត្តត្បូងឃ្មុំ ទី ២ មាត់ច្រកទ្វារព្រំដែនអន្តរជាតិបាវិតខេត្តស្វាយរៀង ទី ៣ មាត់ច្រកទ្វារព្រំដែនអន្តរជាតិជ្រៃធំខេត្តកណ្ដាលនិងទី ៤ មាត់ច្រកទ្វារព្រំដែនអន្តរជាតិព្រែកចាកខេត្តកំពត។  ចំណែកខាងភាគីវៀតណាមក៏ធ្វើដូចគ្នាផងដែរ ដើម្បីទប់ស្កាត់ការចរាចរណ៍ជួញដូរចែកចាយគ្រឿងញៀន​ខុសច្បាប់នៅតាមព្រំដែនរវាងប្រទេសទាំងពីរ ។

លោកអភិបាលរងខេត្តបានបញ្ជាក់ថា ក្រោយពីធ្វើលំហាត់ល្បាតចល័តត្រួតពិនិត្យចប់កម្លាំងចម្រុះ​ពុំបានប្រទះ​ឃើញមុខសញ្ញានោះទេ៕

ដោយ: ភក្ដី