ខេត្តបាត់ដំបង រំពឹងទទួលបានភ្ញៀវទេសចរកើនឡើងនៅថ្ងៃសង្ក្រាន្តឆ្នាំថ្មី

បុណ្យចូលឆ្នាំប្រពៃណីខ្មែរដ៏ខ្លីខាងមុខនេះ រដ្ឋបាលខេត្ត និងមន្ទីរពាក់ព័ន្ធរំពឹងថា ខេត្តបាត់ដំបង អាចនឹងមានភ្ញៀវទេសចរ​ចូលមកកម្សាន្តលើសពីឆ្នាំមុនៗ ដោយសារឆ្នាំនេះមានការរៀបចំទីតាំងកម្សាន្តច្រើនតំបន់ ទាំងនៅក្នុងក្រុង និងនៅតាមរមណីយដ្ឋាននានា។

លោក អ៊ុចអ៊ុ ភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឲ្យដឹងថា អំឡុងថ្ងៃចូលឆ្នាំថ្មីខាងមុខនេះ ខេត្តបាត់ដំបង បានសហការជាមួយសហភាពសហព័ន្ធយុវជនកម្ពុជា ដើម្បីរៀបចំនូវកម្មវិធីអបអរសាទរសង្ក្រាន្តឆ្នាំថ្មីឡើងវិញ ដែលមានកម្មវិធីកម្សាន្តធំៗ និងថ្មីៗ ជាច្រើន រួមជាមួយការរៀបចំកែលម្អ នៅតាមគោលដៅទេសចរណ៍សំខាន់ៗ ដែល អាចជាកត្តានាំអោយមានការទាក់ទាញភ្ញៀវទេសចរជាតិ អន្តរជាតិ អោយចូលមកទស្សនាកម្សាន្ត ក្នុងខេត្តបាត់ដំបង មានចំនួនកើនឡើងច្រើន បើធៀបនឹងឆ្នាំចាស់កន្លងទៅ។

លោកប្រធានមន្ទីរបានបន្តថា ក្រៅពីការរៀបចំកម្មវិធីកម្សាន្តសប្បាយជាច្រើនថ្ងៃ នៅកណ្តាលទីក្រុងក៏នៅមានការរៀបចំកែលម្អតំបន់រមណីយដ្ឋាននានា តាមលក្ខណ:ផ្សេងៗគ្នា ដោយគោលដៅខ្លះមានព្រៃ ភ្នំ ផ្តល់ឱកាសឲ្យភ្ញៀវផ្លាស់ប្តូរ បរិយាកាសស្រូបយកខ្យល់អាកាសបរិសុទ្ធ ឬបានគយគន់ព្រៃព្រឹក្សាសម្រស់ ធម្មជាតិ និងគោលដៅទេសចរណ៍ខ្លះទៀត មានទឹកហូរ ទឹកធ្លាក់ ដំណាំចម្ការទំពាំងបាយជូរ ចម្ការទុរេន ចម្ការម្រេច បានរៀបចំល្អ ត្រៀមខ្លួនរួចជាស្រេចរង់ចាំទទួលស្វាគមន៍ភ្ញៀវទេសចរ មកលេងលំហែអារម្មណ៍ ឬសម្រាកបោះតង់ជួបជុំក្រុមគ្រួសារ មិត្តភក្តិយ៉ាងប្រសើរ និងមនោរម្យ។

រមណីយដ្ឋាន និងគោលដៅទេសចរណ៍ជាច្រើនក្នុងខេត្តបាត់ដំបង មានដូចជា រមណីយដ្ឋានប្រាសាទបាណន់, រមណីយដ្ឋានភ្នំសំពៅ, រមណីយដ្ឋានប្រាសាទឯកភ្នំ, រមណីយដ្ឋានស្ទឹងថ្មដា ចម្ការទុរេន, រមណីយដ្ឋានទឹកធ្លាក់ ៥៣ ភ្នំព្រឹក, រមណីយដ្ឋាន នគរជុំ ភ្នំព្រឹក, រមណីយដ្ឋានចម្ការទុរេនអូរតង, រមណីយដ្ឋានវាល ចម្បាំង ខេមសាយ, សហគមន៍អេកូទេសចរណ៍ទឹកធ្លាក់អូរជាំ, រមណីយដ្ឋាន ស្ទឹងក្រញូង, មណ្ឌលកម្សាន្តក្នុងទីវត្តអារាមផ្សេងៗ ត្រៀមរៀបចំនូវកម្មវិធីសាសនា វប្បធ៌ម ប្រពៃណី ផងដែរ ដោយក្នុងនោះរដ្ឋបាលខេត្តក៏បានត្រៀមលក្ខណ:ដើម្បីអោយប្រជាពលរដ្ឋ និងភ្ញៀវទេសចរលេងនូវល្បែងប្រជាប្រីយ៍ផងដែរ ៕

អត្ថបទ៖ សោ និយមរ័ត្ន