កីឡា

ថៃចុះឈ្មោះប្រកួតស៊ីហ្គេមនៅកម្ពុជាច្រើនជាងគេគឺជិត២ពាន់នាក់

បានផុស

២ years មុន

នៅ

ថ្ងៃអង្គារ ៤ មេសា ២០២៣

ដោយ

គិតត្រឹមថ្ងៃទី៣ ខែមេសា ឆ្នាំ២០២៣ ប្រទេសទាំង១១បានចុះឈ្មោះប្រតិភូ និងអត្តពលិកចូលរួមប្រកួតកីឡាស៊ីហ្គេម លើកទី៣២ បានភាគច្រើនហើយមុនពេលពិធីបើកជាផ្លូវការនៅថ្ងៃទី៥ ខែឧសភា ខណៈប្រទេសថៃបានចុះឈ្មោះចូលរួមច្រើនជាងគេរហូតដល់១៩៨៥នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍លោក ថោង ខុន រដ្ឋមន្ត្រីក្រសួងទេសចរណ៍ អនុប្រធានអចិន្ត្រៃយ៍គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម (CAMSOC-CAMAPGOC) ក្នុងពិធីទទួលទានអាហារសាមគ្គីក្នុងមហាគ្រួសារកីឡាកម្ពុជាដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញជាអធិបតីភាពកាលពីល្ងាចថ្ងៃទី៣ ខែមេសា ឆ្នាំ២០២៣ នៅមជ្ឈមណ្ឌលកោះពេជ្រ បង្ហាញថា ប្រទេសឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី ថៃ និងវៀតណាម បានចុះឈ្មោះប្រតិភូ និងអត្តពលិកច្រើនជាងកម្ពុជា ខណៈព្រុយណេ ឡាវ មីយ៉ាន់ម៉ា និងទីម័រខាងកើតតិចជាងម្ចាស់ផ្ទះ។

១១ប្រទេសបានចុះឈ្មោះមានចំនួនដូចខាងក្រោម៖

១-ប្រតិភូកីឡា កម្ពុជា ចំនួន ១១៥៨ នាក់
២-ប្រតិភូកីឡា ព្រុយណេ ចំនួន ១១៣នាក់
៣-ប្រតិភូកីឡា ឥណ្ឌូណេស៊ី ចំនួន ១៨០២នាក់
៤-ប្រតិភូកីឡា ឡាវ ចំនួន ៦៥៦នាក់
៥-ប្រតិភូកីឡា ម៉ាឡេស៊ី ចំនួន ១៥៣២នាក់
៦-ប្រតិភូកីឡា មីយ៉ាន់ម៉ា ចំនួន ៦៩៤នាក់
៧-ប្រតិភូកីឡា ហ្វីលីពីន ចំនួន ១៣៤២នាក់
៨-ប្រតិភូកីឡា សិង្ហបុរី ចំនួន ១២២៨នាក់
៩-ប្រតិភូកីឡា ថៃ ចំនួន ១៩៨៥នាក់
១០-ប្រតិភូកីឡា ទីម័រខាងកើត ចំនួន ១៧១នាក់
១១-ប្រតិភូកីឡា វៀតណាម ចំនួន ១៦៦៣នាក់។

តាមកាលបរិច្ឆេទការចុះឈ្មោះត្រូវបានបិទបញ្ចប់កាលពីថ្ងៃទី២៤ ខែមីនា ប៉ុន្តែប្រសិនបើការចុះឈ្មោះមានការយឹត ពេលវេលានៃការចុះឈ្មោះអាចពន្យារពេលច្រើនថ្ងៃទៀត។ ទោះបីជាយ៉ាងណា ស៊ីហ្គេម លើកទី៣២ នៅកម្ពុជានេះមិនមានព័ត៌មានពាក់ព័ន្ធនឹងការពន្យារពេលចុះឈ្មោះឡើយ។

សូមបញ្ជាក់ថា ស៊ីហ្គេម លើកទី៣២ ត្រូវបានសម្រេចដាក់កីឡា៣៦ប្រភេទ និងកីឡាប្រកួតសម្តែង១ប្រភេទ ដែលមានវិញ្ញាសា៥៨១។ ពិធីបើកជាផ្លូវការថ្ងៃទី៥ ខែឧសភា និងបិទបញ្ចប់ថ្ងៃទី១៧ ខែឧសភា ខណៈកីឡា១០ប្រភេទប្រកួតមុនពិធីបើក៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣