ឥណ្ឌា និងចិន ប៉ះទង្គិចគ្នារឿងទិដ្ឋាការអ្នកសារព័ត៌មាន

ប្រទេស​ចិន និង​ឥណ្ឌា​បាន​ចោទប្រកាន់​គ្នា​ទៅ​វិញ​ទៅ​មក​កាលពី​ថ្ងៃ​ព្រហស្បតិ៍​ទាក់ទិននឹង​បញ្ហា​ទិដ្ឋាការ​សម្រាប់​អ្នកសារព័ត៌មាន​នៅក្នុងប្រទេសទាំងពីរ ។

អ្នកឆ្លើយឆ្លងព័ត៌មានមកពីកាសែត The Hindu និងទូរទស្សន៍ Prasar Bharati បាននិយាយថា ទិដ្ឋាការរបស់ពួកគេត្រូវបានចាប់បង្កកទុក បន្ទាប់ពីទីក្រុងញូវដែលីបានជំទាស់នឹងការប្តូរឈ្មោះជាផ្លូវការនៃទីតាំងចំនួន ១១ នៅក្នុងរដ្ឋភាគខាងកើត Arunchal Pradesh ដែលប្រទេសចិន ហៅថា ភាគខាងត្បូងទីបេ និងអះអាងថាជាទឹកដីរបស់ខ្លួន ។

ពាក់ព័ន្ធជាមួយបញ្ហាទិដ្ឋាការនេះ អ្នកនាំពាក្យក្រសួងការបរទេសចិនលោកស្រី Mao Ning បានឆ្លើយតបថា អ្នកកាសែតចិនក៏ទទួលភាពអយុត្តិធម៌ និងការរើសអើងនៅក្នុងប្រទេសឥណ្ឌាអស់រយៈពេលជាយូរមកហើយផងដែរ ខណៈដែលនៅប្រទេសចិនវិញមិនមានការរើសអើងអ្នកសារព័ត៌មានឥណ្ឌានោះឡើយ ។

គួរបញ្ជាក់ថា រវាងចិន និងឥណ្ឌា​ ប្រទេសទាំងពីរតែងតែមានបញ្ហាជាមួយគ្នាជាញឹកញាប់នៅតាមបណ្តោយព្រំដែន រហូតដល់មានមនុស្សស្លាប់ថែមទៀតផង ​៕

ប្រែសម្រួលដោយ ៖ នាង រតនៈ

ប្រភព ៖ Alarabiya News