ស្នងការខេត្តកំពង់ឆ្នាំង​បញ្ចេញកម្លាំង​ជាង ៦០០ នាក់ ការពារសណ្ដាប់ធ្នាប់​ក្នុងពេលចូលឆ្នាំ

ស្នងការដ្ឋាននគរបាលខេត្តកំពង់ឆ្នាំង លោកឧត្តមសេនីយ៍ទោ ខូវ លី បានប្រជុំដាក់ចេញនូវផែនការធំៗចំនួន ២ ដើម្បីការពារសន្តិសុខ និងរៀបចំសណ្ដាប់ធ្នាប់ឱ្យបានល្អ ដោយមានកងកម្លាំងនគរបាលសរុបចំនួន ៦២៩ នាក់ ការពារ ​៤១​គោលដៅ ក្នុងខេត្តទាំងមូល សម្រាប់ពិធីបុណ្យចូលឆ្នាំខ្មែរ ២០២៣ មានរយៈពេល៣ថ្ងៃ ដែលនឹងប្រព្រឹត្តទៅនៅថ្ងៃទី ១៤-១៦ ខែមេសា ឆ្នាំ២០២៣ និងផែនការទី ២ ព្រឹត្តិការណ៍ស៉ីហ្គេមលើកទី៣២ (32nd SEA Game) និង អាស៊ានប៉ារ៉ាហ្គេមលើកទី ១២( 12th ASEAN Para Game) នឹងប្រារព្ធឡើងនៅកម្ពុជា ដែលនេះ គឺជាព្រឹត្តិការណ៍ប្រវត្តិសាស្ត្រ ដោយកម្ពុជាយើងធ្វើជាម្ចាស់ផ្ទះ។

លោកស្នងការនគរបាលខេត្តក៏សូមអំពាវនាវផងដែរ ដល់ប្រជាពលរដ្ឋទាំងអស់សូមមេត្តាចូលរួមគោរពច្បាប់ចរាចរណ៍ឲ្យបានទាំងអស់គ្នាដើម្បីរួមគ្នាកាត់បន្ថយគ្រោះថ្នាក់ចរាចរណ៍ក្នុងពិធីបុណ្យចូលឆ្នាំប្រពៃណីខ្មែរ។

ជាមួយគ្នានេះដែរក៏សូមចូលរួមអនុវត្តគោលនយោបាយភូមិឃុំមានសុវត្ថិភាពនៅគ្រប់មូលដ្ឋាន ការពារសន្តិសុខសណ្តាប់ធ្នាប់ជូនប្រជាពលរដ្ឋឲ្យបានចូលរួមសប្បាយរីករាយក្នុងពិធីបុណ្យចូលឆ្នាំខ្មែរ៕

អត្ថបទ៖ ឈៀង ថារិទ្ធ