ប្រជាពលរដ្ឋថៃនាំគ្នាសម្រុកទៅស្រុកកំណើត ដើម្បីអបអរពិធីបុណ្យចូលឆ្នាំថ្មី

ទិដ្ឋភាពប្រជាជនថៃនាំគ្នាសម្រុកវិលត្រឡប់ទៅស្រុកកំណើតវិញ ចាប់តាំងពីថ្ងៃទី១១ ខែមេសា នៅតាមស្ថានីយ៍រថយន្តក្រុងនៅក្នុងទីក្រុងបាងកក ក្នុងឱកាសថ្ងៃឈប់សម្រាកបុណ្យចូលឆ្នាំថ្មី (សង្ក្រាន្តឆ្នាំថ្មី) ដែលតាមស្ថានីយ៍នីមួយៗក្នុងទីក្រុងបាងកកមានអ្នកដំណើរយ៉ាងកកកុញ ដែលអ្នកដំណើរទាំងនោះភាគច្រើនជាងគេធ្វើដំណើរទៅភាគខាងជើង និងឦសាន។

លោក Sanyalak Panwattanalikit ប្រធានក្រុមហ៊ុនដឹកជញ្ជូនថៃបាននិយាយថា ចាប់ពីថ្ងៃទី ១១-១២ ខែមេសា ឆ្នាំ២០២៣ គេរំពឹងថា ចំនួនអ្នកដំណើរដែលប្រើប្រាស់សេវានៅស្ថានីយ៍រថយន្តក្រុងបាងកកទាំង៥ មានអ្នកដំណើរកើនឡើងយ៉ាងខ្លាំង ហើយរថយន្តរបស់លោកមានចំនួន ៧០០គ្រឿង អាចដឹកអ្នកដំណើរបានរហូតដល់ ១សែននាក់ក្នុងមួយថ្ងៃ។

ក្នុងឱកាសបុណ្យចូលឆ្នាំថ្មីនេះ នៅតាមបណ្តាស្ថានីយ៍រថយន្តក្រុងនីមួយៗបានណែនាំដល់គ្រប់ភាគីទាំងអស់ត្រូវបង្កលក្ខណៈងាយស្រួលដល់សាធារណជនអ្នកធ្វើដំណើរដោយភាពងាយស្រួល និងសុវត្ថិភាព ស្របតាមគោលនយោបាយរបស់ក្រសួងសាធារណការនិងដឹកជញ្ជូន ដោយត្រូវអនុវត្តតាមបទប្បញ្ញត្តិ និងច្បាប់យ៉ាងតឹងរ៉ឹង មិនឱ្យឆ្លៀតឱកាសដំឡើងតម្លៃសំបុត្រ ប្រសិនបើមានជនឆ្លៀតឱកាសនឹងត្រូវផាកពិន័យ និងចាត់វិធានការច្បាប់ ដើម្បីទប់ស្កាត់ការស្វែងរកផលប្រយោជន៍ពីការដំឡើងតម្លៃសំបុត្ររថយន្តក្រុងក្នុងអំឡុងពេលនេះ៕

ប្រែសម្រួល៖ គង់ សំអាន

ប្រភព៖ THE STANDARD