អាជ្ញាធរខណ្ឌដូនពេញ ឲ្យពលរដ្ឋរាយការណ៍តាមផេក បើមានទីតាំងផ្ញើម៉ូតូណាយកលើស ១,០០០រៀល

រដ្ឋបាលខណ្ឌដូនពេញ បានដំណឹងអំពីទីតាំងផ្ញើម៉ូតូដែលប្រជាពលរដ្ឋយកមកផ្ញើ ដើម្បីកម្សាន្តស​ប្បាយនៅរមណីយដ្ឋានប្រវត្តិសាស្រ្តវត្តភ្នំ គឺមានតម្លៃ ១,០០០រៀល ហើយបើមានទីតាំងផ្ញើម៉ូតូណាយកលើសពីការកំណត់ ប្រជាពលរដ្ឋអាច Comment ចូលក្នុង Page របស់រដ្ឋបាលខណ្ឌដូនពេញ ដើម្បីមានវិធានការបន្ត។

សេចក្ដីជូនដំណឹង នៅថ្ងៃទី ១៥ ខែមេសា ឆ្នាំ ២០២៣នេះ បានឲ្យដឹងថា ដោយយោងលើគោលការ​ណ៍ដឹកនាំរបស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ គឺរដ្ឋបាលខណ្ឌដូនពេញ បានបញ្ជាក់ថា ចំពោះការផ្ញើម៉ូតូមានតម្លៃ ១,០០០រៀលក្នុងមួយគ្រឿង និងរថយន្តមានតម្លៃ ២,០០០រៀល ក្នុងមួយគ្រឿង។

ក្នុងនោះ រាល់ការបាត់បង់ ឬខូចខាតម៉ូតូ និងរថយន្តដែលបានផ្ញើនៅចំណតរបស់ខ្លួន ម្ចាស់ចំណតត្រូវទទួលខុសត្រូវទាំងស្រុង។

រដ្ឋបាលខណ្ឌដូនពេញ បានបញ្ជាក់ទៀតថា ក្នុងករណី ម្ចាស់ចំណតណាមិនអនុវត្តតាមចំណុចទី ១ និងចំណុចទី ២ខាងលើ សូមសាធារណៈជនទំនាក់ទំនងមករដ្ឋបាលខណ្ឌដូនពេញ តាមរយៈទូរស័ព្ទលេខ៖ ០១៧ ៨៨៤ ៨៨៨ /០១១ ៣៧៧ ៦៦៦៕