អាល្លឺម៉ង់​បិទស្ថានីយចុងក្រោយរបស់ខ្លួន ដើម្បីបញ្ឈប់ការផលិតនុយក្លេអ៊ែរ

ប្រទេសអាល្លឺម៉ង់បានបិទស្ថានីយថាមពលនុយក្លេអ៊ែរចំនួនបីចុងក្រោយរបស់ខ្លួន កាលពីថ្ងៃសៅរ៍ ដែលជាការបញ្ចប់ផែនការ ក្នុងការបញ្ឈប់ថាមពលនុយក្លេអ៊ែរ។

បន្ទាប់ពីឧបទ្ទវហេតុ ឆ្នាំ២០១១ នៅរោងចក្រនុយក្លេអ៊ែរ Fukushima Daiichi របស់ប្រទេសជប៉ុន រដ្ឋបាលរបស់អធិការបតី Angela Merkel បានអនុម័តគោលនយោបាយដំណាក់កាលនុយក្លេអ៊ែរ។ ផែនការដំបូងគឺបិទរោងចក្រទាំងអស់នៅខែធ្នូ ឆ្នាំ២០២២ ប៉ុន្តែរដ្ឋាភិបាលអាល្លឺម៉ង់បានពន្យារពេលផែនការនេះ បន្ទាប់ពីរុស្ស៊ីបានកាត់បន្ថយការផ្គត់ផ្គង់ឧស្ម័នធម្មជាតិ ក្រោយជម្លោះជាមួយអ៊ុយក្រែន។

កាលពីថ្ងៃសៅរ៍ សមាជិកនៃក្រុមពលរដ្ឋបានប្រមូលផ្តុំគ្នានៅជិតរោងចក្រថាមពលនុយក្លេអ៊ែរ Neckarwestheim ដែលជារោងចក្រមួយក្នុងចំណោមបីចុងក្រោយ នៅភាគខាងត្បូង ប្រទេសអាល្លឺម៉ង់។ ពួកគេ​បាន​កាន់​បដា​ដែល​និយាយ​ថា ​ការ​ផលិត​ថាមពល​នុយក្លេអ៊ែរ​គឺត្រូវបាន​បញ្ចប់ហើយ។

អ្នកចូលរួមនាំគ្នានិយាយទាំងរីករាយថា ពួកគេសប្បាយចិត្តណាស់ដែលគ្រោះថ្នាក់បង្កឡើងដោយរោងចក្រនុយក្លេអ៊ែរត្រូវបានបាត់បង់។

យ៉ាងណាមិញ ការស្ទង់មតិមតិនាពេលថ្មីៗនេះបង្ហាញថា ប្រជាជនចំនួន ៥៩ភាគរយ នៅក្នុងប្រទេសអាល្លឺម៉ង់បានប្រឆាំងនឹងការលុបបំបាត់រោងចក្រថាមពលនុយក្លេអ៊ែរ ខណៈដែល ៣៤ភាគរយបានគាំទ្រវា។ ដោយឡែកសហគមន៍ធុរកិច្ចរបស់ប្រទេសក៏បានសម្តែងការព្រួយបារម្ភអំពីគោលនយោបាយនេះផងដែរ។

ក្រុមអ្នកសង្កេតការណ៍បាននិយាយថា រដ្ឋាភិបាលអាល្លឺម៉ង់នឹងប្រឈមបញ្ហាក្នុងការទ្រទ្រង់ និងផ្គត់ផ្គង់ថាមពល ប្រសិនចង់ពង្រីកប្រភពថាមពលនេះឡើងវិញ ស្របពេលដែលបច្ចុប្បន្នរដ្ឋាភិបាលក៏ត្រូវការដោះស្រាយការចោលកាកសំណល់នុយក្លេអ៊ែរដែលមានវិទ្យុសកម្មខ្លាំងផងដែរ៕

ប្រែសម្រួល៖ សន្យា

ប្រភព៖​​ NHK

ចុចអាន៖ នេះវីដេអូក្នុងហេតុការណ៍បំផ្ទុះគ្រាប់បែក នៅកន្លែងសុន្ទរកថានាយករដ្ឋមន្ត្រី Kishida Fumio

ចុចអាន៖ លោក ត្រាំ ថា ពិភពលោកកំពុងជួបបញ្ហាធំបំផុតមួយ