កីឡា

វិញ្ញាសាគុនខ្មែរ២ប្រភេទនេះ កម្ពុជារំពឹងឈ្នះមេដាយមាស

បានផុស

១ year មុន

នៅ

ថ្ងៃអង្គារ ១៨ មេសា ២០២៣

ដោយ

ក្រុមអត្តពលិកកីឡាគុនខ្មែររំពឹងខ្ពស់មែនទែនក្នុងការឈ្នះមេដាយមាសលើវិញ្ញាសាចំនួន២ក្នុងចំណោមវិញ្ញាសាទាំង១៩នៃកីឡាប្រដាល់គុនខ្មែរ ក្នុងព្រឹត្តិការណ៍កីឡាស៊ីហ្គេម លើកទី៣២ នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជាបានដាក់ចំនួន១៩វិញ្ញាសា ស្មើនឹង១៩មេដាយមាស។ ក្នុងនោះមាន១១វិញ្ញាសាសម្រាប់បុរស, ៦វិញ្ញាសាសម្រាប់នារី និង២វិញ្ញាសាទៀតគឺ ការសម្តែងឯកត្តជនបុរស និងសម្តែងនារី។ វិញ្ញាសាសម្តែងឯកត្តជនទាំងពីរគឺកម្ពុជារំពឹងខ្ពស់ក្នុងការទទួលបានមេដាយមាស បើប្រៀបធៀបនឹង៦ប្រទេសផ្សេងទៀត។

ប្រទេសទាំង៧ដែលបានចុះឈ្មោះចូលរួមប្រកួតគុនខ្មែរក្នុងកីឡាស៊ីហ្គេម លើកទី៣២នេះ ឃើញថា ម្ចាស់ផ្ទះកម្ពុជាមានលក្ខណៈល្អប្រសើរសម្រាប់វិញ្ញាសាសម្តែងដែលនៅស្រុកខ្មែរតាំងពីដើមមកហៅថា «ថ្វាយបង្គំគ្រូ ឬគុនគ្រូ»។ កម្ពុជាមានរបៀបថ្វាយបង្គំគ្រូតាំងពីយូរលង់ណាស់មកហើយ ហើយក៏មានរបៀបថ្វាយបង្គំគ្រូច្រើនប្រភេទដែរ។

បើសម្លឹងទៅមើល ហ្វីលីពីន ម៉ាឡេស៊ី ឥណ្ឌូណេស៊ី មីយ៉ាន់ម៉ា និង វៀតណាម ប្រហែលជាមិនសូវពូកែខ្លាំងទេពីរបៀបថ្វាយបង្គំគ្រូ ប៉ុន្តែប្រទេសឡាវអាចចាត់ទុកជាដៃគូប្រជែងមេដាយមាសដែរ ដោយសារប្រទេសនេះក៏មានក្បាច់គុន មួយឡាវ និងមានរបៀបថ្វាយបង្គំច្រើនសំបូរបែបដែរ។

ទោះបីជាយ៉ាងណា មុនចូលរួមប្រកួតស៊ីហ្គេម ប្រទេសនីមួយៗសុទ្ធតែបានហ្វឹកហាត់ និងត្រៀមខ្លួនយ៉ាងល្អ ដូច្នេះក្នុងនាមជាម្ចាស់ក្បាច់គុនខ្មែរមិនត្រូវមើលស្រាលដៃគូប្រកួតឡើយ៕