ខ្លែងឯក មានប្រជាប្រិយភាពជាងគេ​ក្នុងចំណោមខ្លែងចំនួន ២៧ប្រភេទ របស់កម្ពុជា

ភ្នំពេញ៖ អ្នកសិក្សាស្រាវជ្រាវអំពីខ្លែងនៅប្រទេសកម្ពុជា បានឱ្យដឹងថា ក្នុងចំណោមខ្លែងទាំង២៧ប្រភេទ ដែលគេបានរកឃើញមានតែខ្លែងឯកមួយគត់ ដែលមានប្រជាប្រិយភាពជាងគេ ដោយសារវាមានរូបរាងស្អាត និងមានបន្លឺសំឡេងពីរោះដូចតន្ត្រី។

ថ្លែងក្នុងសន្និសីទសារព័ត៌មានស្តីពីការរៀបចំបង្ហោះខ្លែងអន្តរជាតិធ្វើនៅខេត្តព្រះសីហនុនៅថ្ងៃទី៦និងទី៧ឧសភា លោកស្រី ជៀង ណារិន ដែលជាសហអ្នកនិពន្ធសៀវភៅស្តីពីខ្លែងឯកបានឱ្យដឹងថា ខ្លែងឯកដែលជាខ្លែងប្រពៃណី​របស់ខ្មែរ និងមានពន្លឺសំឡេង ព្រោះខ្លែងឯកមានឈ្មោះហៅតាំងពីបុរាណមកថា ខ្លែងព្នង ឬខ្លែងមេកូន។ ខ្លែងឯក មានឆ្អឹងស្លាប និងឆ្អឹងទ្រូង ធ្វើអំពីឫស្សីពាស ដោយក្រដាស និងអណ្ដាតឯក ធ្វើអំពីផ្ដៅកន្ទុយ ធ្វើអំពីស្លឹកត្នោត ឬភ្ជុល ឬក៏ស្លឹកទ្រាំង។

បើតាមលោក ស៊ឹម សារ៉ាក់ ដែលជាសហអ្នកនិពន្ធសៀវភៅស្តីពីខ្លែងឯក បានឱ្យដឹងដែរថាខ្លែងឯក មានប្រវត្តិតាំងពី ៤០០ឆ្នាំមុន គ្រិស្តសករាជមកម្ល៉េះ និងអ្នកស្រុកតែងតែធ្វើបង្ហើរលេងនៅពេលយប់ពេលខ្យល់ធ្លាក់មកពីទិសខាងជើង និងក្រោយពេលប្រមូលផលស្រែចម្ការរួចរាល់ដោយមានវាលស្មៅល្វឹងល្វើយ ដែលជាឱកាសអាច​បង្ហើរលេងកម្សាន្ត​សប្បាយ។

លោកបានបន្តថា ខ្លែងឯកជាខ្លែងប្រពៃណីខ្មែរនឹងមាន៣ទម្រង់ គឺទី១ ខ្លែងឯកបូរាណមានចុងស្លាបមានរាងដូចស្នែង, ទី២ ខ្លែងឯកចុងស្លាបរាងខ្វែង និងទី៣ខ្លែងឯកញីចុងស្លាប់រាងមូល។

ខ្លែងឯកជាខ្លែងមានប្រជាប្រិយភាពជាងគេ ក្នុងចំណោមខ្លែងទាំង ២៧ប្រភេទ ដោយសារវាមានរូបរាងស្អាត និងមានអណ្ដាតអាចបន្លឺសំឡេងយ៉ាងពីរោះនៅពេលហោះលើមេឃប៉ះនឹងខ្យល់ខ្លាំង។

លោក ស៊ឹម សារ៉ាក់ បានបញ្ជាក់ថា កាលពីមុនខ្លែងឯកមានបញ្ចេញសំឡេងបានរហូតដល់ទៅ១៧សម្លេង។ ប៉ុន្តែបច្ចុប្បន្នអាចបញ្ចេញសំឡេង បានតែ៥សម្លេងប៉ុណ្ណោះ។

លោកស្រី ជៀង ណារិន បានបន្ថែមថា ខ្លែងឯក មិនត្រឹមតែបានរស់ឡើងវិញនោះទេតែត្រូវបានសាកលលោក ទទួលស្គាល់ និងឱ្យតម្លៃថា ខ្លែងឯកមានរាងស្អាត និងមានសំឡេងដូចតន្ត្រីនិងមានទម្រង់ដូចយន្តហោះទៀតផង ដោយខ្លែងឯកបានចូលមហោស្របខ្លែងអន្តរជាតិជាញឹកញាប់ដូចជានៅប្រទេសក្នុងតំបន់អាស៊ានមានប្រទេសថៃ វៀតណាម សិង្ហបុរី ឥណ្ឌូណេស៊ី និងម៉ាឡេស៊ី។ នៅអាស៊ីបូព៌ាដូចជាប្រទេសចិន កូរ៉េ ជប៉ុន នៅអាស៊ីខាងត្បូងមាន​ប្រទេសឥណ្ឌានិងបណ្ដាប្រទេសមួយចំនួននៅអឺរ៉ុបដូចជាអង់គ្លេសបារាំងអ៊ីតាលី និងប្រទេសទួរគីជាដើម។

លោកស្រីបានឱ្យដឹងទៀតថា បើប្រជាពលរដ្ឋចង់ដឹងថា ខ្លែងឯកបញ្ចេញសំឡេងពីរោះកម្រិតណានោះ​សូមអញ្ជើញទៅ​ចូលរួមព្រឹត្តិតការណ៍​បង្ហោះខ្លែងអន្តរជាតិដែលធ្វើនៅខេត្តព្រះសីហនុនៅថ្ងៃទី ៦ និងទី ៧ ឧសភាឆ្នាំ ២០២៣ ខាង​មុខនេះ ដោយមានការចូលរួមបង្ហោះខ្លែងពីក្រុមអន្តរជាតិមកពី ៨ប្រទេស រួមមាន សិង្ហបុរី ថៃ វៀតណាម ម៉ាឡេស៊ី ឥណ្ឌូនេស៊ី បារាំង ចិន និងហ្វីលីពីន ដោយក្រុមនីមួយៗ នឹងបង្ហាញខ្លែងគ្រប់ទំហំ និងរូបរាងប្លែកៗពីគ្នាផងដែរ៕

អត្ថបទ៖ សំអឿន