សម្ដេចតេជោ ហ៊ុន សែន ៖ អំណាចដែលសម្ដេចមានរាល់ថ្ងៃនេះ គឺប្រជាជនជាអ្នកឲ្យ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា អំណាចដែលសម្ដេចមានរាល់ថ្ងៃនេះ គឺប្រជាជនជាអ្នកឲ្យ ហើយអំណាចនេះគឺដើម្បីការពារសេចក្ដីសុខរបស់ប្រជាជន។

ការលើកឡើងនេះ គ្រាដែលសម្ដេចតេជោ ហ៊ុន សែន បានអញ្ជើញជាអធិបតីក្នុងពិធីបុណ្យបញ្ចុះខណ្ឌ​សីមា​ព្រះវិហារ ពុទ្ធាភិសេក និងឆ្លងសមិទ្ធផលនានាក្នុងវត្តព្រះបារមីវង្កតបុរី ស្ថិតនៅ​សង្កាត់​ទឹកថ្លា ខណ្ឌសែនសុខ រាជធានីភ្នំពេញ នៅព្រឹកថ្ងៃទី ២៤ ខែមេសា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងថា បុគ្គលខ្លះ ចង់ធ្វើជានាយករដ្ឋមន្ត្រីខ្លះណាស់ តែពួកគេមិនមានឱកាសធ្វើឡើយ។ ចំណែកសម្ដេច មិនចង់ធ្វើ និងមិនស្គាល់តំណែងនាយករដ្ឋមន្ត្រីផងនោះ តែបានមកធ្វើជានាយករដ្ឋមន្ត្រី រហូតជិត ៤ទសវត្សរ៍ទៅហើយ។ ក្នុងនោះ បើគិតតំណែងផ្សេងៗទៀត នៅក្នុងរាជរដ្ឋាភិបាល គឺមានរយៈពេល ៤៤ឆ្នាំហើយ ដែលបំបែកឯតទគ្គកម្មនៅលើពិភពលោក រួចស្រេចទៅហើយ។

សម្ដេចតេជោ ហ៊ុន សែន ថ្លែងបែបនេះថា «ឯតទគ្គកម្មដែលបានបំបែកនោះ ស្អី? រដ្ឋមន្ត្រីការបរទេសដែលក្មេងជាងគេលើពិភពលោក អាហ្នឹងឯតទគ្គកម្មទីមួយ ឯតទគ្គកម្មទីពីរ នាយករដ្ឋមន្ត្រីដែលក្មេងជាងគេលើពិភពលោក ឯតទគ្គកម្មដែលបានបំបែក គឺនាយករដ្ឋមន្ត្រីដែលយូរជាងគេនៅលើពិភពលោក គឺ ៣ឯតទគ្គកម្ម»។

សម្ដេចតេជោ ហ៊ុន សែន លើកឡើងដែរថា អំណាចដែលសម្ដេចមានរាល់ថ្ងៃនេះ គឺប្រជាជនជាអ្នកឲ្យ ហើយអំណាចដែលសម្ដេចនេះ គឺដើម្បីការពារសេចក្ដីសុខរបស់ប្រជាជន។

សម្ដេចតេជោ ហ៊ុន សែន ថ្លែងបែបនេះថា «កុំឲ្យវាពិបាកទៀត លោក ហ៊ុន សែន ឯងក្រាញអំណាច អើ…អំណាចនេះប្រជាជនឲ្យ ចុះអ្នកឯងកំពុងតែចង់បានអំណាចនោះវាស្អីដែរ អាគេកំពុងការពារអំណាចដើម្បីសេចក្ដីសុខរបស់ប្រជាជន ទៅជាខុសអី? រួចចុះអ្នកឯង ចង់ធ្វើនាយករដ្ឋមន្ត្រីដែរ តើវាយ៉ាងម៉េចដែរ? គួរតែនិយាយមើលមុខ មើលក្រោយផង»៕