មកដឹងចំនួនពលរដ្ឋ រុស្ស៊ី នៅក្នុងប្រទេស ស៊ូដង់ ដែលកំពុងផ្ទុះការប្រយុទ្ធគ្នា

ឯកអគ្គរដ្ឋទូតរបស់ទីក្រុងមូស្គូប្រចាំនៅទីក្រុងខាទុំលោក Andrey Chernovol បានប្រាប់ប្រព័ន្ធផ្សព្វផ្សាយរដ្ឋរុស្ស៊ីថា បច្ចុប្បន្នមានជនជាតិរុស្សីប្រមាណ ៣០០ នាក់កំពុងស្ថិតនៅក្នុងប្រទេសស៊ូដង់ ។

ទន្ទឹមនោះលោក Chernovol បានបញ្ជាក់ទៀតថា ក្នុងចំណោមពលរដ្ឋរុស្ស៊ីទាំង ៣០០ នាក់នោះ ក៏មាន ១៤០ នាក់ប្រកាសចង់ចាកចេញពីប្រទេសស៊ូដង់ ដែលកំពុងផ្ទុះការប្រយុទ្ធគ្នាយ៉ាងខ្លាំងក្លាផងដែរ ។

ពាក់ព័ន្ធនឹងបញ្ហានេះដែរ លោកឯកអគ្គរដ្ឋទូតបានលើកឡើងថា រដ្ឋាភិបាលទីក្រុងមូស្គូក៏មានផែនការជម្លៀសពលរដ្ឋរបស់ខ្លួនផងដែរ ប៉ុន្តែមិនទាន់អាចអនុវត្តបាននៅឡើយទេ ព្រោះការហោះហើរជម្លៀស គឺនឹងធ្វើការឆ្លងកាត់តំបន់ជួរមុខដែលមានការប្រយុទ្ធគ្នា ។

លោក Chernovol បានបន្ថែមថា មានមនុស្សប្រហែល ១៥ នាក់ រួមទាំងស្ត្រី និងកុមារម្នាក់ បានជាប់គាំងនៅក្នុងព្រះវិហារគ្រិស្តអូស្សូដក់របស់រុស្ស៊ី ដែលមានទីតាំងជិតនឹងការប្រយុទ្ធគ្នាយ៉ាងធ្ងន់ធ្ងរក្នុងទីក្រុងខាទុំ ។

គួរបញ្ជាក់ថា ការប៉ះទង្គិចគ្នារវាងកងទ័ពស៊ូដង់ និងកងកម្លាំងគាំទ្ររហ័ស (RSF) ដែលអូសបន្លាយពេលដល់សប្ដាហ៍ទី ២ ហើយនោះ បានសម្លាប់ជនស៊ីវិលជាង ៤០០ នាក់ និងប្រហែល ៣,៧០០ នាក់រងរបួស ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី ប្រាប់គោលដៅសំខាន់ទើបឈានដល់ផ្ទុះសង្គ្រាមជាមួយ អ៊ុយក្រែន