ក្លិបអ្នកកាសែតដឹកនាំអ្នកសារព័ត៌មានធ្វើទស្សនកិច្ចនៅខេត្តព្រះសីហនុ

នៅថ្ងៃទី ២៥ ដល់ថ្ងៃទី២៧ ខែមេសា ឆ្នាំ២០២៣ ក្លិបអ្នកកាសែតកម្ពុជា បានរៀបចំកម្មវិធីដំណើរទស្សនកិច្ចសារព័ត៌មានទៅកាន់ខេត្តព្រះសីហនុ រយៈពេល៣ថ្ងៃ។ ដំណើរទស្សនកិច្ចនេះ គឺដឹកនាំដោយលោក ពុយ គា ប្រធានក្លិបអ្នកកាសែតកម្ពុជា ដោយមានការចូលរួមរបស់អ្នកសារព័ត៌មានចម្រុះស្ថាប័នប្រមាណជាង៣០រូប។

ដំណើរទស្សនកិច្ចសារព័ត៌មាននេះ គឺធ្វើឡើងក្រោមកិច្ចសហការរវាងក្លិបអ្នកកាសែតកម្ពុជា និងក្រសួងទេសចរណ៍ ព្រមទាំងរដ្ឋបាលខេត្តព្រះសីហនុ។ ក្នុងនោះ នៅព្រឹកថ្ងៃទី២៥នេះ ក្រុមអ្នកសារព័ត៌មាន បានធ្វើទស្សនកិច្ចនៅកំពង់ផែស្វយ័តក្រុងព្រះសីហនុ ខណៈនៅពេលរសៀល នឹងធ្វើទស្សនកិច្ចនៅអាងប្រព្រឹត្តកម្មទឹកកខ្វក់ PS2 និងទស្សនាភាពរីកចម្រើននៃទីក្រុងព្រះសីហនុ ក្រោមការសម្របសម្រួលរបស់លោក ឡុង ឌីម៉ង់ អភិបាលរងខេត្តព្រះសីហនុ។

រីឯនៅថ្ងៃទី២៦ ខែមេសា ក្រុមអ្នកសារព័ត៌មាន នឹងចូលរួមក្នុងវេទិកាទេសចរណ៍មួយចំនួន ជាអាទិ៍៖ វេទិកាទេសចរណ៍មេគង្គ សន្និសីទសារព័ត៌មានដែលរៀបចំដោយក្រសួងទេសចរណ៍ និងរដ្ឋបាលខេត្តព្រះសីហនុ និងវេទិកាសារព័ត៌មានស្ដីពីគោលនយោបាយទេសចរណ៍ និងស្ថានភាពទេសចរណ៍ក្នុងខេត្តព្រះសីហនុ ក្រោមវត្តមានរបស់លោក ថោង ខុន រដ្ឋមន្រ្តីក្រសួងទេសចរណ៍ និងលោក គួច ចំរើន អភិបាលខេត្តព្រះសីហនុ។

ដោយឡែកនៅថ្ងៃទី២៧ ដែលជាថ្ងៃទី៣ នៃកម្មវិធីដំណើរទស្សនកិច្ចសារព័ត៌មាននេះ នឹងបន្តធ្វើទស្សនកិច្ចទៅកាន់តំបន់អភិវឌ្ឍន៍រាម និងកោះសំពោច រួមទាំងកម្មវិធីមួយចំនួនទៀតផងដែរ៕

ដោយ៖ ធឿន វ៉ាន់សុង