អាមេរិក អាចប្រឈមបញ្ហាធ្ងន់ធ្ងរចំនួន ៤ បើរដ្ឋាភិបាលលុបចោលបំណុល

លោកស្រី Janet Yellen រដ្ឋមន្ត្រីក្រសួងរតនាគារអាមេរិកព្រមានថា សេដ្ឋកិច្ចអាមេរិកអាចមានហានិភ័យដ៏ធំ គឺភាពអត់មានការងារធ្វើ សេដ្ឋកិច្ចចុះខ្សោយ បរាជ័យ​ក្នុងការទូទាត់បំណុល និងអត្រាការប្រាក់កើនឡើងកាន់តែខ្ពស់ជានិរន្ត​ ប្រសិនបើរដ្ឋាភិបាលធ្វើការលុបចោលបំណុលរបស់ខ្លួននៅឆ្នាំនេះ ។  

ថ្លែងក្នុងសន្និសីទនៅទីក្រុងវ៉ាស៊ីនតោន លោកស្រី Yellen លើកឡើងថា ផលវិបាករបស់សហរដ្ឋអាមេរិកចំពោះបញ្ហានេះ នឹងមានការបំផ្លិចបំផ្លាញកាន់តែធំ ប្រសិនបើរដ្ឋាភិបាលខកខានក្នុងការសងបំណុលរបស់ខ្លួនក្នុងរយៈពេលប៉ុន្មានខែខាងមុខនេះ ។

តាមការព្យាករណ៍របស់លោកស្រី​ ការធ្លាក់ចុះ​នេះទំនងធ្វើឲ្យអាមេរិកខកខាន ឬកាត់បន្ថយការផ្គត់ផ្គង់ផ្នែកយោធា ​និងសន្តិសុខ​សង្គមដ៏សំខាន់ ។ បន្ថែមពីនេះ អាមេរិកអាចទទួលរងការបណ្តេញបុគ្គលិករដ្ឋាភិបាលយ៉ាងច្រើននៅក្នុងសេណារីយ៉ូដ៏អាក្រក់បំផុត ខណៈ​ការធ្លាក់ចុះដ៏សាហាវនេះ ក៏នឹងធ្វើឲ្យគ្រួសាររាប់ពាន់ខកខានការទូទាត់លើថ្លៃផ្ទះ រថយន្ត និងប័ណ្ណឥណទាន ដែលនាំទៅដល់ទីផ្សារឥណទានអាមេរិកដួលរលំ ។

ជាមួយនឹងទស្សនវិស័យដ៏អាក្រក់នេះ លោកស្រី Yellen ក៏បានអំពាវនាវដល់សមាជិកសភាអាមេរិក ដំឡើងពិដានបំណុលឲ្យបានឆាប់រហ័ស ពោលកុំឲ្យវាយឺតពេលដាច់ខាត ។

ដោយឡែក កាលពីសប្តាហ៍មុន ប្រធានសភាអាមេរិកលោក Kevin McCarthy បានស្នើរដំឡើងពិដានបំណុលបន្ថែម ១.៥ ពាន់ពាន់លានដុល្លារ ប៉ុន្តែទាមទារឲ្យកាត់បន្ថយការចំណាយរបស់រដ្ឋាភិបាលចំនួន ៤.៥ ពាន់ពាន់លានដុល្លារផងដែរ ។

ទោះជាយ៉ាងណា លោក​ប្រធានាធិបតី Joe Biden បែរបាន​អំពាវនាវ​ឲ្យ​សភា​ដំឡើង​ពិដាន​បំណុល​ដោយ​គ្មាន​លក្ខខណ្ឌ​ជាមុនទៅវិញ ហើយ​បាន​គំរាម​វេតូ​លើ​ច្បាប់​ស្នើសុំរបស់លោក McCarthy ផងដែរ ។

គួរឲ្យដឹងថា កាលពីដើមឆ្នាំនេះ ​អាមេរិកត្រូវ​បានអុកឡុក​ដោយកម្រិត​បំណុល​ដែល​កំណត់​ដោយ​ខ្លួន​ឯង ហើយចាប់តាំងពីពេលនោះមក នាយកដ្ឋានរតនាគារបាននិងកំពុងចាត់វិធានការប្លែកពីគេដើម្បីការពារការសងបំណុលទាំងនោះ ៕

ប្រែសម្រួល ៖ នាង​ រតនៈ

ប្រភព ៖ Sputnik

ចុចអាន៖ ទីក្រុងមូស្គូព្រមានថា រុស្ស៊ី កំពុង ខិតកាន់តែ ជិត ទៅនឹងជម្លោះ នុយក្លេអ៊ែរ ជាមួយ អាមេរិក