លោក បៃដិន គំរាមថា បើ គីម ជុងអ៊ុន ហ៊ានវាយប្រហារនុយក្លេអ៊ែរ, កូរ៉េខាងជើងនឹងវិនាស

ប្រធានាធិបតីអាមេរិកលោក ចូ បៃដិន បានប្រកាសកាលពីថ្ងៃពុធទី២៦ខែមេសាថា បើកូរ៉េខាងជើង ហ៊ានវាយប្រហារនុយក្លេអ៊ែរលើប្រទេសរបស់លោក ឬកូរ៉េខាងត្បូង នោះទីក្រុងព្យុងយ៉ាងនឹងត្រូវវិនាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ ប្រធានាធិបតីកូរ៉េខាងត្បូង លោក យូន ស៊ុកយុល បានគូសបញ្ជាក់ថា ក្រោមកិច្ចព្រមព្រៀងថ្មីរវាងទីក្រុងវ៉ាស៊ីនតោននិងសេអ៊ូល សហរដ្ឋអាមេរិកនឹងឆ្លើយតបទៅនឹងការវាយប្រហារដោយអាវុធនុយក្លេអ៊ែរ។

លោក បៃដិន បានប្រាប់អ្នកយកព័ត៌មាននៅឯសេតវិមានថា “ការវាយប្រហារនុយក្លេអ៊ែរដោយកូរ៉េខាងជើងប្រឆាំងនឹងសហរដ្ឋអាមេរិក ឬសម្ព័ន្ធមិត្ត ឬដៃគូរបស់ខ្លួន គឺមិនអាចទទួលយកបានឡើយ ហើយរបបណាហ៊ានធ្វើបែបនេះ នឹងទទួលលទ្ធផលទៅវិញ”។

ការគំរាមរបស់លោក បៃដិន ធ្វើឲ្យគេនឹកឃើញដល់ការគំរាមរបស់អតីតប្រធានាធិបតីអាមេរិកលោក ដូណាល់ ត្រាំ ដែលកាលពីឆ្នាំ២០១៧ បានព្រមានកូរ៉េខាងជើងថា លោកនឹងឆ្លើយតបដោយភ្លើងនិងកំហឹង ដែលពិភពលោកមិនធ្លាប់បានឃើញ ប្រសិនបើប្រទេសនេះគំរាមកំហែងសហរដ្ឋអាមេរិកដោយអាវុធនុយក្លេអ៊ែរ។

ថ្វីបើកូរ៉េខាងជើងបានសាកល្បងនុយក្លេអ៊ែរនៅមួយខែក្រោយនោះក៏ដោយ ប៉ុន្តែលោក ត្រាំ និងមេដឹកនាំកូរ៉េខាងជើងលោក គីម ជុងអ៊ុន បានយល់ព្រមបន្ធូរបន្ថយភាពតានតឹង និងជួបប្រជុំគ្នាជាច្រើនដង។

ទីក្រុងព្យុងយ៉ាង បានបាញ់សាកល្បងមីស៊ីលជាង១០០គ្រាប់ចាប់តាំងពីដើមឆ្នាំ២០២២មក ហើយក្នុងខែនេះ បានធ្វើតេស្តមីស៊ីលអន្តរទ្វីបប្រើឥន្ធនៈរឹងលើកដំបូងរបស់ខ្លួន និងយន្តហោះដ្រូនវាយប្រហារក្រោមទឹកដែលមានសមត្ថភាពនុយក្លេអ៊ែរ។

លើសពីនេះ មន្ត្រីនៅទីក្រុងវ៉ាស៊ីនតោន និងសេអ៊ូលបានអះអាងតាំងពីឆ្នាំមុនថា កូរ៉េខាងជើងកំពុងត្រៀមលក្ខណៈសម្រាប់ការសាកល្បងអាវុធនុយក្លេអ៊ែរនៅក្រោមដី លើកទីប្រាំពីររបស់ខ្លួន៕

ប្រែសម្រួល៖ Vann Vann

ប្រភព៖ RT

ចុចអាន៖ មិននឹកស្មានថា កូរ៉េខាងជើង កាន់តែអស្ចារ្យ នៅកន្លែងណាក៏អាចបាញ់មីស៊ីលបាន