​សម្ដេចតេជោ ហ៊ុន សែន ហាមមិនផ្ដល់មុខដំណែងដល់មន្ត្រីរត់ការឡើងតាមខ្សែ​

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី ២៧ ខែមេសា ឆ្នាំ ២០២៣នេះ បានថ្លែង​ហាមផ្ដល់មុខ​ដំណែងដល់មន្ត្រីដែលស៊ើបហើយរត់ការយកមុខដំណែង និងឡើងតាមខ្សែ។

​សម្ដេចតេជោ ហ៊ុន សែន មានប្រសាសន៍នៅក្នុងពិធីបិទវគ្គបណ្ដុះបណ្ដាល ឆ្នាំ ២០២២ និងបើក​វគ្គ​បណ្ដុះ​បណ្ដាលឆ្នាំ ២០២៣ នៃសាលាភូមិន្ទរដ្ឋបាលថា ប្រសិនបើយើងយកមន្ត្រីនៅមូលដ្ឋាន ល្អជាងយកមន្ត្រីទៅពីម្ងាយ ដោយសារមន្ត្រីទាំងនោះមានផ្ទះសម្បែងនៅទីនោះស្រាប់ បើយើងបញ្ជូនមន្ត្រីទៅពីចម្ងាយថ្ងៃសៅរ៍-អាទិត្យ និងថ្ងៃបុណ្យមិននៅប្រចាំការនៅខេត្តទេ ឡើងមកជួបប្រពន្ធកូននៅភ្នំពេញ។

សម្ដេចតេជោ ហ៊ុន សែនមានប្រសាសន៍ថា សម្ដេចតែងតែជំទាស់ និងមិនផ្ដល់ការចុះហត្ថលេខាបោះពីថ្នាក់ជាតិទៅថ្នាក់ក្រោមជាតិ បើមិនដូច្នោះទេមន្ត្រីថ្នាក់ជាតិទៅដណ្ដើមកន្លែងមន្ត្រីថ្នាក់ក្រោមជាតិ ដែលមិនយុត្តិធម៌សម្រាប់មន្ត្រីថ្នាក់មូលដ្ឋានផង។

សម្ដេចតេជោ ហ៊ុន សែន មានប្រសាសន៍បន្តថា៖ «ក្រុមខ្លះពូកែស៊ើបណាស់ ខ្ញុំសូមផ្ដែផ្ដាំសម្ដេចក្រឡាហោម ឬសម្ដេចពិជ័យ ឧទាហរណ៍ថា អ្នកនេះជិតចូលនិវត្តន៍ហើយ ហើយរត់ការដាក់មកកន្លែងហ្នឹង អាធន់ហ្នឹង អាក្រុមណារត់ការ អាហ្នឹងកុំផ្ដល់ឱ្យ ឱ្យសោះបើដឹងដល់ខ្ញុំគឺខ្ញុំអត់ឱ្យទេ កុំឱ្យមានទម្លាប់រត់ការ និងតាមខ្សែ»។

សម្ដេចតេជោ ហ៊ុន សែន បញ្ជាក់ថា ត្រូវផ្ដល់យុត្តិធម៌ដល់មន្ត្រីដែលកំពុងបម្រើការងារនៅទីតាំងនោះ៕