សម្តេច​តេជោ ហ៊ុន សែន ​សរសើរ​ចំពោះ​ការ​ផលិតបទ «ស្រឡាញ់អ្វីដែលខ្មែរមាន»​​របស់​អ្នកឧកញ៉ា ឡេង ណាវ៉ាត់ត្រា​

សម្តេចតេជោ ហ៊ុន សែន កោតសរសើរចំពោះការផលិតបទ «ស្រឡាញ់អ្វីដែលខ្មែរមាន» របស់​ផលិត​កម្មហ្គាឡាក់ស៊ី របស់អ្នកឧកញ៉ា ឡេង ណាវ៉ាត់ត្រា​ ខណៈ​បទ​​នេះ​កំពុង​មាន​ភាព​ល្បីល្បាញ​ទាំង​ក្នុង​ និងក្រៅប្រទេស ដោយ​មាន​អ្នកទស្សនាឡើងដល់ជាង៦២លាននាក់ហើយ។

​ថ្លែង​​ក្នុងឱកាសជួបសំណេះសំណាលជាមួយគណៈប្រតិភូកីឡារបស់កម្ពុជា នាថ្ងៃទី១ ខែឧសភា ឆ្នាំ២០២៣ នៅវិមានសន្តិភាព មុននឹងពួកគេចូលរួមប្រកួតកីឡាស៊ីហ្គេមលើកទី៣២។​សម្ដេចតេជោ​បាន​មាន​​ប្រសាសន៍​ថា «បទចម្រៀងស្រឡាញ់អ្វីដែលខ្មែរមាន ឥឡូវនេះកំពុងតែល្បីទូទាំងប្រទេស និងក្រៅប្រទេស»។

សម្ដេចតេជោនាយករដ្ឋមន្ត្រីក៏បានថ្លែងអំណរគុណចំពោះក្រុមហ៊ុនហ្គាឡាក់ស៊ី​ណាវ៉ាត្រា និង​វាយ​តម្លៃ​ខ្ពស់​ចំពោះ​កំពូលតារាចម្រៀង ព្រាប សុវត្ថិ ខេមរៈ សិរីមន្ត ខេម និង តង់ ច័ន្ទសីមា ដែលបាន​សម្ដែង​បាន​យ៉ាង​ល្អ​ ព្រម​ទាំង​ក្រុម​ការងារ​ទាំង​ឡាយ​ដែល​បាន​ដឹកនាំ​ផលិតបទ​ចម្រៀង​របស់​ខ្មែរ​មួយ​នេះ​។

បទចម្រៀងស្រឡាញ់អ្វីដែលខ្មែរមាននេះ គឺត្រូវបានសម្ដែងម្ដងរួចមកហើយកាលពីពេលកន្លងទៅ និងត្រៀមសម្ដែងម្ដងទៀតនៅក្នុងឱកាសបិទព្រឹត្តិការស៉ីហ្គេមនៅកម្ពុជា។ សម្ដេចតេជោ ហ៊ុន សែន បានចាត់ទុកការសម្ដែងបទចម្រៀងនេះ គឺកាន់តែញ៉ាំង​ព្រឹត្តិការណ៍​ស៊ីហ្គេម​ឱ្យ​កាន់​តែ​ល្បីល្បាញ​ទៅ​កាន់​ពិភពលោក ដែលជាព្រឹត្តិការណ៍ប្រវត្តិសាស្ត្របន្ទាប់ពីឆ្នាំ១៩៦៦ ក្នុង​ពេល​ដែល​ព្រះបរម​រតនកោដ្ឋ​ដឹក​នាំ​សង្គមរាស្ត្រនិយម។ កម្ពុជាបានរង់ចាំរយៈពេល៦៤ឆ្នាំ ដើម្បី​រៀប​ចំ​ព្រឹត្តិការណ៍​នេះ​ឡើង​វិញ ​ក្រោម​ព្រះរាជវត្តមានព្រះមហាក្សត្រ ដែល​បាន​យាង​ព្រះរាជទាន​ព្រះអគ្គិជ័យ​កីឡា​ចេញ​ពី​ប្រាសាទ​អង្គរវត្ត។

​ត្រឹមរយៈពេល៣សប្ដាហ៍ប៉ុណ្ណោះ បទចម្រៀងស្រឡាញ់អ្វីដែលខ្មែរមាន ឬ CAMBODIAN PRIDE មានអ្នកទស្សនាច្រើនជាង៦២លាននាក់ (62K) ដែលជាចំនួនដ៏ច្រើនបំផុតមួយក្នុង​ចំណោម​បទ​ចម្រៀង​ដទៃទៀត បើគិតត្រឹមរយៈពេលដូចដ៏ខ្លីនេះ៕

ទស្សនា​ចម្រៀង៖