អ៊ុយក្រែន ពឹងលើប្រទេសចំនួន ៤ ទើបអាចចូលជាសមាជិកអង្គការណាតូ

រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយកាលពីថ្ងៃអង្គារថា ការចូលជាសមាជិកអង្គការណាតូរបស់អ៊ុយក្រែន គឺអាស្រ័យលើការសម្រេចចិត្តរបស់ប្រទេសជាសមាជិកចំនួន ៤ ។

លោក Kuleba បាននិយាយនៅក្នុងបទសម្ភាសន៍ជាមួយប៉ុស្តិ៍ទូរទស្សន៍ 1+1 របស់អ៊ុយក្រែនថា “ការចូលរួមជាមួយអង្គការណាតូ គឺអាស្រ័យលើប្រទេសជាសមាជិកចំនួន ៤ ប៉ុណ្ណោះ ហើយមួយក្នុងចំណោមប្រទេសទាំងនោះគឺជាអ្នកមានសិទ្ធិអំណាច និងមានសារៈសំខាន់នៅក្នុងអង្គការណាតូ” ។

អ្នកការទូតកំពូលរូបនេះបាននិយាយទៀតថា “ប្រទេសមួយក្នុងចំណោមប្រទេសទាំង ៤ បានចាប់ផ្តើមមានចិត្តរេរា លើសមាជិកភាពរបស់អ៊ុយក្រែននៅក្នុងអង្គការណាតូ ដែលជាសម្ព័ន្ធមិត្តយោធាអន្តររដ្ឋាភិបាលដែលបច្ចុប្បន្នមានសមាជិកចំនួន ៣១” ។

លោក Kuleba បញ្ជាក់ទៀតថា ដំណើរការនេះក៏បានរំឭកដល់អ៊ុយក្រែនអំពីកិច្ចខិតខំប្រឹងប្រែងរបស់ប្រទេសដែលព្យាយាមទទួលបានឋានៈបេក្ខជនសម្រាប់សមាជិកភាពនៃសហភាពអឺរ៉ុប (EU) ផងដែរ” ។

គួរបញ្ជាក់ថា ការអត្ថាធិប្បាយរបស់លោក Kuleba ស្តីពីសមាជិកភាពរបស់អ៊ុយក្រែនក្នុងអង្គការណាតូបានកើតឡើង នៅពេលដែលសម្ព័ន្ធភាពយោធាមួយនេះត្រៀមរៀបចំកិច្ចប្រជុំកំពូលនៅរដ្ឋធានី វីលនីញូស នៃប្រទេសលីទុយអានី នាខែកក្កដាខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី ថា មិនខ្វះទេអាវុធសម្រាប់ប្រយុទ្ធនៅ អ៊ុយក្រែន