អត្ថាធិប្បាយ

តើ ថៃ នឹងមានការផ្លាស់ប្ដូររដ្ឋាភិបាលយោធាក្នុងការបោះឆ្នោតខាងមុខឬក៏យ៉ាងណា?

បានផុស

២ years មុន

នៅ

ថ្ងៃចន្ទ ៨ ឧសភា ២០២៣

ដោយ

ប្រជាជនក្នុងប្រទេសថៃ នឹងទៅបោះឆ្នោតសកលនៅថ្ងៃទី១៤ ខែឧសភាខាងមុខនេះ ខណៈគណបក្សប្រឆាំងដ៏ធំបំផុតកំពុងនាំមុខការបោះឆ្នោតស្ទង់មតិនៅក្នុងយុទ្ធនាការឃោសនាបោះឆ្នោតសម្រាប់ជ្រើសរើសសមាជិកសភាជាន់ទាបចំនួន ៥០០ រូប ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអាស៊ីអាគ្នេយ៍មួយនេះត្រូវបានគ្រប់គ្រងដោយរដ្ឋាភិបាលដែលមានទំនាក់ទំនងនឹងយោធា ចាប់តាំងពីរដ្ឋប្រហារកាលពី ៩ ឆ្នាំមុន ខណៈការបោះឆ្នោតខាងមុខនេះ ប្រជាជនថៃកំពុងរង់ចាំមើលថាតើនឹងមានការផ្លាស់ប្ដូររដ្ឋាភិបាលយោធាឬក៏យ៉ាងណា ។

យោងតាម លទ្ធផលស្ទង់មតិដែលចេញផ្សាយត្រឹមថ្ងៃទី៣ ខែឧសភា បង្ហាញថា គណបក្សភឿថៃដែលជាបក្សប្រឆាំងធំជាងគេកំពុងនាំមុខ ដោយមានសំឡេងគាំទ្រ ៣៨.៣ ភាគរយ ដោយសារតែគណបក្សនេះមានទំនាក់ទំនងជាមួយអតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត់ត្រា ដែលត្រូវបានគេបណ្តេញចេញ ។

ទន្ទឹមនោះ គណបក្សភឿថៃ បានតែងតាំងកូនស្រីរបស់លោក ថាក់ស៊ីន គឺលោកស្រី ផេថងថាន ស៊ីណាវ៉ាត់ត្រា ជាបេក្ខជននាយករដ្ឋមន្ត្រី ខណៈបច្ចុប្បន្នលោកស្រីកំពុងទទួលបានការគាំទ្រយ៉ាងខ្លាំង ព្រោះតែគោលនយោបាយដំឡើងប្រាក់ឈ្នួលអប្បបរមា ។

ចំណែកលោកនាយករដ្ឋមន្ត្រី ប្រាយុទ្ធ ចាន់អូចា ដែលបានចូលរួមជាមួយគណបក្សថ្មីគឺគណបក្សថៃរួមរួបជាតិ (UTN) ដើម្បីរក្សាតំណែងនាយករដ្ឋមន្ត្រីរបស់លោក ទទួលបានសំឡេងគាំទ្រត្រឹមតែ ១២.១ ភាគរយប៉ុណ្ណោះ ។

ស្របពេលជាមួយគ្នានេះ ការស្ទង់មតិក៏បង្ហាញផងដែរថា ៣៤ ភាគរយនៃប្រជាពលរដ្ឋដែលមានសិទ្ធិបោះឆ្នោត នឹងបោះឆ្នោតឲ្យគណបក្សចលនាឆ្ពោះទៅមុខ (MFP) ខណៈបក្សប្រឆាំងមួយនេះកំពុងទទួលបានការគាំទ្រពីអ្នកបោះឆ្នោតវ័យក្មេង ។

គួរបញ្ជាក់ថា នៅក្នុងការបោះឆ្នោតនាថ្ងៃទី ១៤ ឧសភា ខាងមុខនេះ អ្នកបោះឆ្នោតថៃនឹងត្រូវគូសលើសន្លឹកឆ្នោតចំនួន ២ គឺសន្លឹកឆ្នោតមួយសម្រាប់ជ្រើសរើសបេក្ខជននៅក្នុងមណ្ឌល និងសន្លឹកឆ្នោតមួយទៀត សម្រាប់គណបក្សនយោបាយដែលពួកគេពេញចិត្ត ៕