រដ្ឋគ្រោងចំណាយទឹកប្រាក់ជាង ៣ លានដុល្លារតបណ្តាញស្ថានីយទឹកស្អាតទៅស្រុកសៀមបូក

នៅក្នុងពិធីសម្ផោធដាក់ឱ្យប្រើប្រាស់ស្ថានីយទឹកស្អាតនៅខេត្តស្ទឹងត្រែងលោក ចម ប្រសិទ្ធ រដ្ឋមន្រ្តីក្រសួងឧស្សាហកម្មវិទ្យាសាស្រ្ត បច្ចេកវិទ្យា និងនវានុវត្តន៍មានប្រសាសន៍ថា រាជរដ្ឋាភិបាលគ្រោងនឹងចំណាយទឹកប្រាក់ពី ៣ លានកន្លះទៅ៤​លានដុល្លារសម្រាប់តបណ្តាញពីស្ថានីយធំទៅកាន់ស្រុកសៀមបូក និងអាចសាងសង់អនុស្ថានីយមួយទៀតនៅអូរពងមាន់។

ស្ថានីយផលិតទឹកស្អាតនេះមានតម្លៃជាង ១៣ លានដុល្លារ ត្រូវបានដាក់សម្ពោធឱ្យប្រើប្រាស់ដំណើរការនៅថ្ងៃទី ២៤ ខែឧសភា ជាផ្លូវការហើយស្ថិតនៅភូមិបាចុង សង្កាត់ព្រះបាទ ក្រុងស្ទឹងត្រែង។

លោករដ្ឋមន្រ្តីមានប្រសាសន៍ថា ក្រោយពីបើកសម្ផោធសមទ្ធផលថ្មីមួយនេះលើទឹកដីខេត្តស្ទឹងត្រែង នៅពេលខាងមុខនេះនឹងមានចំណងដៃមួយសម្រាប់អ្នកស្រុកសៀមបូកគ្រោងនឹងចំណាយទឹកប្រាក់ប្រមាណពី៣លានកន្លះ ទៅ៤លានដុល្លារបន្ថែមទៀត សម្រាប់តបណ្តាញពីស្ថានីយ៍ធំ ទៅកាន់ស្រុកសៀមបូក និងអាចសាងសង់អនុស្ថានីយ៍មួយទៀតនៅអូរពងមាន់។

លោក ចម ប្រសិទ្ធបញ្ជាក់ថា បើចចារលុយជាមួយ ADB មិនបានទេលោកនឹងស្នើសុំទៅសម្តេចតេជោ ដើម្បីបានថវិកា៤លានដុល្លារជួយដល់ប្រជាពលរដ្ឋស្រុកសៀមបូកបានទឹកស្អាតប្រើប្រាស់។

លោក ស្វាយ សំអ៊ាង អភិបាលខេត្តបានមានប្រសាសន៍ថានេះគឺជាសមទ្ធផលថ្មីដែលប្រមុខរាជរដ្ឋាភិបាលផ្តល់ឱ្យប្រជាជនខេត្តស្ទឹងត្រែង ស្ថានីយ៍ទឹកស្អាតនេះបានចាប់ផ្តើមសាងសង់នៅឆ្នាំ ២០២០ និងបានបញ្ចប់ឆ្នាំ២០២២ ក្រោមផ្តល់ហិរញ្ញបទាន របស់រាជរដ្ឋាភិបាលតាមរយៈ ADB ក្នុងរង្វង់ទឹកប្រាក់ប្រមាណជាង១៣លានដុល្លារអាមេរិក។

លោកអភិបាលខេត្តមានប្រសាសន៍ទៀតថា ស្ថានីយនេះបានបង្កើតនូវអនុស្ថានីយបូមទឹកមួយរោងចក្រប្រព្រឹត្តកម្មទឹកស្អាតមួយកន្លែងសាងសង់នៅលើផ្ទៃដីជាងមួយហិកតា។

អាចផលិតទឹកស្អាតបានប្រមាណ១២ ពាន់ម៉ែត្រគូប ក្នុងមួយថ្ងៃ តបណ្តាញបានចំនួន១០ឃុំក្នុងស្រុកក្រុងចំនួន៣ បច្ចុប្បន្នប្រជាពលរដ្ឋប្រើប្រាស់បានរហូតជាង៤ពាន់គ្រួសារ៕

អត្ថបទ៖ ងិនលីម