ចិន ផលិតវ៉ាក់សាំងថ្មីច្រើនប្រភេទ ខណៈករណីឆ្លងកូវីដ ផ្ទុះឡើងខ្លាំង 

រលកថ្មីនៃករណីឆ្លងជំងឺកូវីដ១៩នៅប្រទេសចិន នឹងឈានដល់កម្រិតខ្ពស់បំផុតក្នុងខែមិថុនា ខណៈមនុស្សរហូតដល់៦៥លាននាក់ នឹងឆ្លងមេរោគរៀងរាល់សប្តាហ៍។ នេះបើយោងតាមការព្រមានពីអ្នកជំនាញសុខភាពក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Washington Post រាយការណ៍ថា អាជ្ញាធរចិន កំពុងបង្កើនការចាក់វ៉ាក់សាំងក្នុងចំណោមប្រជាជន១.៤ពាន់លាននាក់របស់ខ្លួន ខណៈវីរុសបំប្លែងខ្លួនប្រភេទថ្មី XBB កំពុងវាយលុកភាពស៊ាំសហគមន៍ ដែលបង្កើតឡើង ចាប់តាំងពីប្រទេសចិន បោះបង់គោលនយោបាយសូន្យកូវីដដ៏តឹងរ៉ឹងរបស់ខ្លួនកាលពីឆ្នាំមុន។

អ្នកជំនាញខាងរោគរាតត្បាតលោក Zhong Nanshan កាលពីសប្តាហ៍មុន បានប្រាប់សន្និសីទមួយក្នុងទីក្រុងក្វាងចូវ ថា វ៉ាក់សាំងថ្មីចំនួនពីរប្រភេទ សម្រាប់វីរុសកូវីដបំប្លែងខ្លួនអូមីក្រុងប្រភេទ XBB ត្រូវបានអនុម័តដោយអាជ្ញាធរសុខាភិបាល ខណៈវ៉ាក់សាំងថ្មីពី៣ទៅ៤ផ្សេងទៀត ក៏ត្រូវបានគេរំពឹងថានឹងទទួលបានភ្លើងខៀវក្នុងពេលឆាប់ៗនេះផងដែរ។

លោក Zhong ក៏បានព្យាករផងដែរថា ករណីឆ្លងមេរោគប្រចាំសប្តាហ៍ អាចកើនឡើងដល់ ៦៥លាននាក់នៅចុងខែមិថុនា ពោលគឺលើសពីការប៉ាន់ស្មាន ដែលថាមានត្រឹម៤០លាននាក់។

គួរបញ្ជាក់ថា ការផ្ទុះឡើងថ្មីនេះ អាចជារលកនៃជំងឺកូវីដទ្រង់ទ្រាយធំបំផុត មិនធ្លាប់មានសោះ ចាប់តាំងពីគោលនយោបាយសូន្យកូវីដ ត្រូវបានលុបចោលកាលពីចុងឆ្នាំមុន។ ប៉ុន្តែ​មន្ត្រី​ចិន​ទទូច​ថា រលក​បច្ចុប្បន្ន​នឹង​មិន​សូវ​មាន​សភាព​ធ្ងន់ធ្ងរ​ទេ។

ស្របពេលជាមួយគ្នានោះ រដ្ឋាភិបាល កំពុងផ្តោតការយកចិត្តទុកដាក់លើយុទ្ធនាការចាក់វ៉ាក់សាំង ដើម្បីធានាថា ប្រជាជនភាគច្រើននឹងមិនប្រឈមការស្លាប់ ឬឈឺកូវីដធ្ងន់ធ្ងរនោះទេ ជាពិសេសមនុស្សចាស់៕

ប្រែសម្រួល៖ Vann Vann

ប្រភព៖ 9News

ចុចអាន៖ ចិន ជំរុញឲ្យ WHO ទៅស៊ើបរកប្រភពដើម កូវីដ នៅ អាមេរិក វិញម្តង