លោក Erdogan ស្បថចូលកាន់តំណែងជាប្រធានាធិបតីថ្មីរបស់ តួកគី

នៅថ្ងៃសៅរ៍ ទី៣ ខែមិថុនា លោក Recep Tayyip Erdogan បានស្បថចូលកាន់តំណែងផ្លូវការ ជាប្រធានាធិបតីនៃសាធារណរដ្ឋតួកគី ក្នុងអាណត្តិទី៣ បន្ទាប់ពីឈ្នះឆ្នោតកាលពីថ្ងៃទី២៩ ខែឧសភា កន្លងទៅ។

លោក Erdogan បានស្បថចូលកាន់តំណែងជាប្រមុខរដ្ឋនៅក្នុងសភារបស់ប្រទេសតួកគី ក្រោយទទួលជ័យជម្នះជាប្រវត្តិសាស្ត្រនៅក្នុងការបោះឆ្នោតប្រធានាធិបតី។ ពិធីស្បថចូលកាន់តំណែងត្រូវបានចាប់ផ្ដើមនាពេលព្រឹក និងបន្តដោយអាហារពេលល្ងាច នៅលំនៅដ្ឋានផ្លូវការរបស់អនុប្រធានាធិបតីតួកគី ហើយនៅថ្ងៃនេះលោកនឹងប្រកាសគណៈរដ្ឋមន្ត្រីថ្មីលោកផងដែរ។

គួរបញ្ជាក់ថា លោក Erdogan បានកាន់តំណែងជាប្រធានាធិបតីចាប់តាំងពីឆ្នាំ២០១៤មក។ លោកគឺជាអ្នកអភិរក្សសង្គមដែលបានដឹកនាំប្រទេសតួកគី ឲ្យនៅឆ្ងាយពីការធ្វើសមាហរណកម្មជាមួយសហភាពអឺរ៉ុប ហើយពង្រឹងអំណាចផ្ទាល់ខ្លួននិងលើកកម្ពស់គោលនយោបាយឥស្លាមនិយមនៅក្នុងប្រទេស។

លោកបានបង្កើតទំនាក់ទំនងពាណិជ្ជកម្ម និងការទូតយ៉ាងជិតស្និទ្ធជាមួយរុស្ស៊ីនិងចិន ហើយបានរក្សាជំហរ ជាអ្នកសម្របសម្រួលសន្តិភាពសម្រាប់ជម្លោះក្នុងតំបន់ រួមទាំងនៅអ៊ុយក្រែនផងដែរ៕

ប្រែសម្រួល៖ សន្យា

ប្រភព៖ Sputnik

ចុចអាន៖ ប្អូនស្រី គីម ជុងអ៊ុន រិះគន់ខ្លាំងៗលើកិច្ចប្រជុំរបស់អង្គការសហប្រជាជាតិ

ចុចអាន៖ លោក ថាក់ស៊ីន បញ្ជាក់ច្បាស់ៗពីពេលវេលាវិលត្រឡប់ចូលស្រុកវិញ